Флориан Вирц «Ливерпуль» сафига ўтгач, немис ОАВ унинг ота-онаси тахминан 10 млн. еврога бойиб кетишларини ҳисоблаб чиқишди. Бўлажак футбол суперюлдузи улар ва яна 9 нафар ака-опалари билан улғайди. Ҳа, Флориан - 10 нафар фарзандларнинг кенжатойи!
Отаси ва онаси - унинг агентлари. Фло шу қадар кечки чақалоқки, отаси ва онасини бобоси ва бувиси, деб қабул қилишганди
«Байер»нинг ғалабаси билан якунланган март ойидаги ўйиндан кейин Вирц икки нафар қария томон чопа кетди. Майдон четида турган журналист Марио Рикер ундан муваффақиятни бувиси ва бобоси билан «ювиш» қандай бўлишини сўраганида, Флориан «Улар менинг ота-онам» деган жавобни айтганди. Рикер дарҳол узр сўраб, интервьюни якунлади ва унинг қўлини қисиб қўйди. Фло билан ота-онаси ўртасидаги фарқ жуда катта - Ханс 71, Карин 64 ёшда эдилар. Лекин вазият анча ноқулай эди. «Флориан интервьюни яхши даф этди, биз кулишиб олдик, ҳаммаси жойида», - деганди Ханс мамнунлик билан.
Вирцнинг акалари ва опалари жуда кўп. Уларнинг деярли ҳаммаси ўгайлар: 5 нафар болалар Ханснинг биринчи никоҳидан, 3 нафари Кариннинг дастлабки турмушидан. Фақат Флориан ва опаси Юлиана Ханс ва Кариннинг фарзандлари.
Немис ОАВ хабарига кўра, барча фарзандлар атиги бир йил биргаликда истиқомат қилишган, кейин фақат Флориан ва Юлиана ота-онаси билан бирга бўлишган. Оилада футболни севишарди: қизлари Маридан бошқа ҳамма болалар тўп суришган, лекин фақат Флориан ва Юлиана профессионал даражасига кўтарилишди.
Вирцнинг отаси узоқ йиллардан бери Пульхаймдаги «Браувайлер» клубини бошқариб келмоқда. Лекин унинг асосий иш жойи Федерал чегара хизматида. Флориан ўз фаолиятини айнан шу «Браувайлер» клубида бошлаганди. Унинг онаси Карин эса доимо гандбол мураббийи бўлиб ва Германия терма жамоасида ўйнаётган Юлиан Кастер каби шогирдларни тарбиялаб келмоқда.
Бундан ташқари, Ханс ва Карин - Флорианнинг агентлари. Шу сабабли унинг «Ливерпул»га ўтишидан келадиган даромаднинг каттагина қисми оилада қолади. Ханс контрактлар билан шуғулланади, Карин молиявий масалалар билан.
«Байер» тизимида турли лавозимларда ишлаган Михаэль Решке Вирцлар оиласини яхши билади. Унинг фикрича, оила доимо ўғлининг манфаатини кўзлайди ва фаолиятини муваффақиятли бошқаради. Мабодо, қандайдир ёрдам керак бўлса, унга мурожаат қилишади.
Флориан отасининг агентлик фаолиятига қуйидагича таъриф берганди: «Биламан, у ҳеч қачон менга ёмонликни раво қўрмаган, пул ортидан қувмаган. Биз доимо самимий муносабатда бўламиз, уни жуда ҳурмат қиламан. Менга доимо тўғри маслаҳат берадиган тажрибали суянчиғим борлигидан жуда мамнунман».
Ханс эса Expressга берган интервьюсида шундай деганди: «Мақсадимиз - Флорианнинг футболдан доимо лаззат олиши. Мана шу ҳолат бардавом бўлишини истаймиз. У яхши ўйин кўрсатиб, кўтаринки кайфиятда юрса, биз ҳам оила сифатида завқ оламиз».
Опаси билан тез-тез футбол ўйнаган, кейин битта шаҳар жамоасида тўп суришганди
Юлиана Флориандан 2 ёшга каттароқ. У ҳам футболчилик фаолиятини маҳаллий «Браувайлер» клубида бошлаган, кейин «Кёльн» ва «Байер» клубларида тўп сурганди. 2023 йилда Юлиана «Вердер»га ўтиб, ярим ҳимоячи позициясида тўп сура бошлади. Сўнгги 2та мавсумда Юлиана ўз жамоаси билан аёллар Бундеслигасида 7-ўринни эгаллади, май ойида Германия Кубоги финалида майдонга тушиб, «Бавария»га имкониятни бой берди.
Шунингдек, Юлиана ёшлар терма жамоасида ҳам ўйнаган. Шу билан биргаликда, футбол сирларини қунт билан ўрганмоқда. Мақсади - ўқитувчи бўлиш.
Болалик даврида опа,ука икковлон дуч келган ерда - боғда ҳам, уйнинг меҳмонхонасида ҳам тўп суришган, дарвозалар стол ва диван оралиғидан жой олганди.
Опасининг фикрича, хона ичидаги торгина бўшлиқ тўпни эгаллаб олишни ўрганишга ёрдам берган экан. Тез орада қизалоқ бошланғич мактабда ҳам укаси ва бошқа болакайлар билан билан ўйнаган.
Юлиана «Вердер»ўтиб кетгач, Флориандан анча узоқлашиб қолган бўлсада, аҳиллик йўқолмади. «Баъзан биз бир-биримизга қандайдир маслаҳатлар бериб турамиз. Бизни фақат футбол боғлаб турмайди. Унинг қандай ўйнаётгани мен учун муҳим эмас: яхши ёки ёмон ўйнашидан қатъий назар, Флориан менинг укам. Унинг яхши футболчи эканлиги оиладаги муносабатларимизни ўзгартира олмайди».
Манба: sports.ru, С.РАҲМОНОВ тайёрлади
