Улар учун футбол, шунчаки юмуш!?

Бироқ шунақа футболчиларни кутилганидан кўра тезроқ учратиш мумкин. Бундай спортчилар учун футбол бошқа касблардан фарқ қилмайдиган одатий юмуш. Бўш вақтларида улар нима биландир шуғулланиш ҳақида ўйлайдилар. Келинг яхшиси, ўйинлар ёки машғулотлардан кейин томоша қилмайдиган футболчиларни ёдга оламиз.

Бен Уайт

Ўтган йили Sky Sports мухбирига берган интервьюсида Уайт жумладан, шундай деганди: «Жамоамиз ўйинларини кўриб бораман. Чунки ўзим қандай ўйнаганимни таҳлил қилишни истайман. Лекин шунчаки, бефарқ ўтириб, қандайдир учрашувни томоша қилган эмасман. Болалик давримда ҳам футбол беллашувларини томоша қилмагандим, ҳозир ҳам шундай. Мен бу ўйинни севаман, ўйнаяпман, лекин ҳеч қачон томоша қилган эмасман».

Шунга қарамасдан, касбига нисбатан совуқ муносабат Беннинг чўққига кўтарилиши ва «Арсенал» таркибидан жой олишига монелик қилмади. Шунингдек, футболчи Патрик Виейранинг қандай услубда тўп сурганидан бехабар эканлигини тан олди, лекин мухлислар ростгўйлиги учун Уайтни кечиришган бўлса, ажабмас. Англия терма жамоаси мураббийи Стив Холанд эса Беннинг рақиб жамоа ўйин услубини тушуна олмасликда айблади. Миш-мишларга кўра, бу масалада устоз ва шогирд ўртасида андаккина можаро ҳам бўлиб ўтганди.

Гарет Бэйл

Футбол ўйнаш Бэйлга ёқарди ёки у ҳеч бўлмаганда, Уэльс терма жамоасида тўп суришни хуш кўрарди. Бироқ томоша борасида Гарет гольф ўйинига кўпроқ эътибор қаратиши маълум. 2018 йилда ҳужумчи ESPN мухбири билан суҳбатда яна бир марта тасдиқлади: «Очиғини айтганда, футбол беллашувларини унчалик ёқтирмайман, бунинг ўрнига гольфни томоша қилиш мен учун мароқлироқ».

Карлос Тевес

Тевес «Бока Хуниорс»ни, клуб ҳам уни хуш кўради. Бу ўзаро дўстлик белгиси. Лекин Карлос ҳам гольф ишқибози: «Менга футбол унчалик ёқмайди. Агар ТВда «Барселона» - «Реал» ва бошқа каналда гольф бўйича баҳс кетаётган бўлса, мен гольфни танлайман. Футбол ўйнашни хуш кўраман, лекин телевизор орқали томоша қилишни ёмон кўраман».

Эҳтимол, ҳозир Тевеснинг фикри ўзгариб қолгандир, чунки энди мураббий лавозимида иш бошлади. Умид қиламизки, бу ёғига Карлос ҳеч бўлмаганда рақибларининг ўйин услубини ўрганишга киришади.

Марк-Андре тер Штеген

Дунёнинг энг моҳир дарвозабонларидан бири бўлган германиялик футболчи футбол оламига яхши таниш. Бироқ Марк-Андренинг ўзи унга миллионлаб даромад келтираётган ўйинни ТВ орқа-ли томоша қилмаслиги мутлақо ташвишлантирмайди. Боз устига, тер Штеген ҳатто унга қарши тўп сурадиган ўйинчилар номини ҳам билмайди: «Бошқа жамоалар ўйинчилари номини билмаслигимни айтсам, мухлислар кулги билан эшитадилар. Масалан, Ла Лигада бунақа мунозаралар кўп бўлади. Йигитлар исмини билмасамда, кўз билан кўрганда эслайман. Мабодо уларни видеода кўрсам, ким эканликларини билиб оламан».

Габриэль Батистута

Футбол оламининг афсонаси Аргентина ТВсига берган интервьюсида шундай деганди: «Мен футболни севмайман, у шунчаки, менинг касбим».

Габриэль ўзининг бўш вақтини қандай ўтказган? Чавгон ўйнаган. Дарвоқе, Батигол футболни ёқтирмаслик учун салмоқли далилга эга: «Ҳар гал таътил пайтида Аргентинага келганимда, дўстларим чавгон ўйинига таклиф этишарди. Бу ўйинда қанчалик ўзимни кўрсата олишим менда қизиқиш уйғотди. Бир неча уринишлардан кейин, чавгонга меҳр қўйдим. Бу хобби, бироқ мен доимо савиямни оширишга интиламан. Чунки қанчалик яхши ўйнасам, шунчалик кўп завқ оламан».

Бенуа Ассу-Экотто

«Тоттенхэм»да тўп сурган даврида Бенуа шундай деганди: «Мен футболни томоша қилмайман. Ахир ўзим талаб даражасида ўйнайманку, шундай эмасми? Шунингдек, ўйиндан холи бўлган пайтларда ҳам бу ҳақда оғиз очмайман. Менинг қизиқишларим - дўстлар давраси ва мусиқа. Айниқса, хип-хоп».

Кристиан Вьери

Вьери футбол томошасини ёмон кўрарди, дея олмаймиз. Шунчаки, у крикетнинг ашаддий ишқибози эди. Италия терма жамоасининг аъзоси учун бу танлов ғайритабиийдек туюлиши мумкин. Бироқ Кристиан Австралияда улғайган ва шу спорт турини севиб қолганди.

Бобби Замора

2012 йилда Бобби ўз интервьюсида шундай деганди: «Аслида, мени футбол мухлиси, деб бўлмайди. Оқшомни футбол кўриш билан ўтказишни хуш кўрмайман. Табиатан менга ўхшаган кишилар жуда кўп, фақат бу ҳақда гапирмайдилар. Фаолиятимни якунлаганимдан кейин ҳам ТВ орқали томоша қилмаслигим аниқ».

Замора нафақага чиққанидан кейин бўш вақтини балиқ овига бағишлади.

Роналдиньо

Бразилиялик афсона 2021 йилда испаниялик блогерга шундай деганди: «Футбол томоша қилишга менда ҳеч қачон қизиқиш бўлмаган. Қизиқарли вазиятлар ва голлар туширилган видеолавҳаларни кўришим мумкин, лекин 90 дақиқа тикилиб ўтиришни ёқтирмайман».

А.АҲМЕДОВ тайёрлади.