Буюк футболчиларнинг адашлари

У баъзан ёқимли, баъзан унчалик бўлмаслиги мумкин, лекин вақт ўтиши билан унутилади. Агарда лақаб олувчи касбдошининг фамилиядоши бўлмаса, бир умрга лақабдан фориғ бўла олмайди. қуйидаги ҳикоя лақаб туфайли мухлислар босимига дуч келган айрим футболчилар ҳақида.

Жорж Месси

Лионель Месси «Барселона»нинг буюк ўйинчиси мақомига кўтарилишидан аввал, футбол оламида кўпчиликка танилишга улгурмаган Жорж Месси исмли камерунлик ярим ҳимоячи пайдо бўлганди. У 1999-2016 йиллар оралиғида турли клубларда тўп сурган, миллий терма жамоага жалб этилмаган. Чунки Жорж «Ризеспор», «Локерен» каби ўртамиёна жамоаларда ўйнаган, 2009 йилда «Ольяненсе» билан Португалия олий лигасига чиққан, 2010 йилда эса «Интерклуб» сафида Ангола чемпиони бўлган.

Хоакин Месси

Бу йигит учун ҳаммаси олдинда. 10 йил муқаддам Лионель Мессининг қадрдон шаҳри бўлган Росариода паспортларда чалкашликлар юзага келмаслиги мақсадида ота-оналарга ўз фарзандларига Месси исмини бериш тақиқлаб қўйилганди. Чунки «Месси» - исм эмас, фамилия. Бироқ фамилиядошлар йўқ эмас. Улардан бири «Ньюэллс Олд Бойз» клубининг 22 ёшли тарбияланувчиси Хоакин. У ҳозир «Эстудиантес де Рио Куарто» жамоасида тўп сурмоқда.

Роналдо

Қаҳрамонимиз ўз фаолиятини Бразилиянинг қуйи лигаси Сан-Каэтанода бошлаб, қисқа муддат олий дивизиондаги «Байя» таркибида тўп сурган, кейин «Левски» орқали «Ростов» сафидан жой олганди. Мутасаддилар мухлислар ёқимтойига португалиялик буюк касбдошининг 7 рақамини беришди. Бразилиялик феномен ҳурматидан 9ни беришлари ҳам мумкин эди. Бироқ у нисбатан олис ўтмиш «кумири» - замонавий юлдузларга қиёслаш ўринлироқ.

Матеус Дасаев

Албатта, у дарвозабон - Дасаев Матеус Феррейра де Фрейтас. Посбоннинг отаси ўз фарзандини Ринат Дасаев ва Лотар Матеуслар номи билан улуғлашни маъқул кўрганди. Унинг рафиқаси болакайга Жон Энтони номини мўлжаллаб қўйганди. Бироқ бундан бехабар ота ўғлини ўзи танлаган ном билан расмийлаштириб бўлганди. Бразилиялик Дасаев 2018 йилдан бери ишсиз юрибди. Эҳтимол, у ўз фаолиятига нуқта қўйгандир...
Роналдиньо Гомеш

1979 йилнинг 22 январида туғилган Гомеш Сан Томе ва Принсипи терма жамоаси таркибида ЖЧ-2006 турнирининг саралаш босқичи доирасида Ливияга қарши майдонга тушганди. Ўшанда унинг жамоаси ўз дарвозасидан 8та жавобсиз гол ўтказиб юборган. Ҳа, «Ростов»да тўп суриш ҳаммага насиб этавермайди.

Карим Недвед

Бу ростакам фамилия эмас - «Ал-Аҳли» ўсмирлар жамоасида Каримни шундай номлаш урфга айланиб кетдики, ўнг қанот хавбеки бу номни футболкасига ёздириб олди. Ҳозир Волид (Каримнинг асл фамилияси) Миср чемпионатининг бир неча карра ғолиби мақомида «Ал-Аҳли»даги фаолиятини давом эттирмоқда. Футболчининг ташқи кўринишини инобатга оладиган бўлсак, ҳозирда у Хвичани эслатади.

Муҳаммад Салоҳ

Мисрда Салоҳлар жуда кўп, уларнинг бири бодрингни кирсиллатиб ейиш бўйича жаҳон чемпионатида ғолиб чиқди. Ҳа, бу ҳазил эмас, Кемерово вилоятида шунда мусобақа бўлиб ўтди. Лекин биз айни паллада «Брюгге»нинг ўринбосарлар жамоасида тўп сураётган 20 ёшли Муҳаммад хусусида тўхталишни лозим топдик. 

Назарий жиҳатдан мисрлик афсонанинг номдоши АПЛда тўп суриши мумкин, ахир фаолияти энди бошланди. Қўшимчасига, кичик Муҳаммад бинойидек савияга эга бўлган ҳужумкор ўйинчи.

Пеле

Гвинея-Бисаулик янги Пеле таянч ярим ҳимоячиси. У «Монако»дан ижара асосида «Ноттингем Форест» клубига ўтиб, Чемпионшип доирасида 9 марта майдонга тушган. Бундан аввал футболчи «Милан» ва «Бенфика» клублари билан шартнома имзолаган бўлсада, бирорта учрашувда иштирок этмаган. Фақат Киевнинг «Арсенал» жамоаси таркибида битта беллашувда тўп сурган. 32 ёшли Пеле ҳозирча янги клубини топа олгани йўқ.

А.АБДУВАЛИХЎЖАЕВ тайёрлади