Европада ҳам «МЮ» тенгсиз!

Қизиқ, бутун Европани олсак, якунланган мавсум бу масалада миллий лигаларда қайси жамоалар етакчилик қилди? Аввало, айтиш керак, статистикада фақат миллий чемпионатларга дахлдор кўрсаткичлар инобатга олинган. Зеро, бу мухлислар ташрифини таққослаш учун анъанавий ва энг оптимал вариант ҳисобланади. Зеро, Англия ва Францияда 2тадан кубок турнири бор, қолган мамлакатларда 1тадан. Қолаверса, клублар турли еврокубокларда қатнашади ва ўйинлар сони тенг бўлмайди. Миллий чемпионатларда эса миқдор бўйича деярли тенглик мавжуд.

2-3 йил олдин ҳам Европанинг энг кўп мухлис йиғувчи клуби мақоми учун кураш асосан Дортмунд «Боруссия»си ва «Барселона» ўртасида кечарди. Бунда ажабланадиган томони йўқ. Чунончи, «кўҳна қитъа»даги энг катта ареналар айнан шу икки жамоага тегишли. Бироқ 2021 йилга ҳам чўзилган пандемия чекловлари оқибатида Каталония клуби ҳам, Дортмундники мухлис тўплаш рейтинги бўйича кескин пастлади. Умумий натижаларга келсак, мавсум-2021|2022да энг кўп мухлис «МЮ» стадиони - «Олд Траффорд»га ташриф буюрди. Айтиш ўринли, АПЛ­да ишлари юришмаган жамоа бу борада таъқибчиларини анча ортда ҳам қолдирди. Мана, битта асосий факт - «МЮ» ўртача кўрсаткич (73150 мухлис) борасида 60 минг томошабин маррасидан ўзган Европанинг ягона клуби бўлди. Умуман, мавсум доирасидаги ҳар бир ўйинда «Олд Траффорд»га камида 71 минг мухлис кирди. Ҳаттоки, Лига кубоги баҳсларида ҳам бу меъёр бузилгани йўқ. Буларнинг барчаси чеклов йўқлиги ва футболни қўмсаш эффекти, албатта.

Умуман олганда, «МЮ» якунланган мавсум ўз майдонида жами 26та расмий ўйин ўтказди - АПЛда 19та, ЧЛда 4та, Англия кубогида 2та ва Лига кубогида 1та. Шунча ўйинни «Олд Траффорд»да жами 1 826 291 мухлис бевосита кузатдики, «МЮ» умумий миқдор борасида қолган клубларни бир неча 100 минг кишига ортда қолдирди. Тўғри, экспертларнинг айтишларича, ке­йинги мавсумда «Боруссия» Д., «Бавария» ва «Барселона»нинг мухлис тўплашда «МЮ»дан ўзиб кетиши эҳтимоли катта. Ҳозир эса, европанинг энг кўп мухлис тўплаган 5та клубига қарасак, уларнинг барчаси Буюк Британия вакилларидир. «МЮ» ортида Лондоннинг 3та клуби ва кутилмаганда «Селтик» (Шотландия) бор. Айтиш ўринли, Глазго жамоаси ўз тарихида ҳеч қачон томошабинлар рейтингида бу қадар юқори кўтарилган эмасди. Тўғри, «Селтик» одатда биринчи ва иккинчи 10талик орасидан жой оларди. Эътиборлиси, Англиянинг яна 3та жамоаси 5-10-ўринлар оралиғида. Фақат «Барселона» ва «Марсель» туфайли британча рўйхат кетма-кетлиги бузилганини ҳам айтиш ўринли. Айтганча, Франция клуби короначеклов туфайли 1та ўйинини атиги 5 минг мухлис қаршисида, яна бирини «Лион»га қарши баҳсда кузатилган тартибсизликлар ортидан бўш трибуналар остида ўтказди.

Изоҳ: Ҳисоб-китобда фақат миллий чемпионатлар дои­расидаги ўйинлар инобатга олинган; чеклов вақтидаги ўйинлар ҳам қўшилган.

* Германия ва Нидерландия жамоалари 2021 йили ва 2022 йилнинг бошида амалда бўлган қатъий чекловлар туфайли мухлислар рейтингида ўз мавқеи­ни кескин бой берди. Ке­йинги мавсум рейтингининг мутлақо бошқача кўриниш олиши эҳтимоли катта. Дейлик, «Лидс» ва «Атлетик» каби клубларнинг кучли 30таликка кириши қийин масала.

* АПЛ 39989 мухлисга тенг ўртача кўрсаткич билан жаҳоннинг энг кўп томошабин йиққан лигаси бўлди. Ла Лига аудиторияси — 22829, «А» серияники — 18181, Бундеслиганики — 20791. 

* Испания чемпиони «Реал» рейтингда атиги 20-ўринни эгаллади. «Сантьяго Бернабеу»нинг ўртача кўрсаткичи - 41304.

МАВСУМ-2021|2022: ЕВРОПАНИНГ ЭНГ КЎП  МУХЛИС ТЎПЛАГАН 30та КЛУБИ

№ Жамоалар              Мамлакат                    Ўйин                Ўртача                                                                                                               кўрсаткич

1 «МЮ»                        Англия             19                    73150

2 «Арсенал»                Англия             19                    59776

3 «Вест Хэм»               Англия             19                    58367

4 «Тоттенхэм»             Англия             19                    56523

5 «Селтик»                  Шотландия      19                    56079

6 «Барселона»              Испания         19                    53850

7 «Ливерпуль»            Англия             19                    53008

8 «Манчестер Сити»    Англия             19                    52774

9 «Марсель»               Франция                      19                    51549

10 «Ньюкасл»              Англия                         19                    51487

11 «Атлетико»             Испания                       19                    48039

12 «Рейнжерс»                        Шотландия      19                    45315

13 «Интер»                  Италия             19                    44999

14 «Милан»                 Италия                        19                    44027

15 «Рома»                               Италия             19                    41911

16 «Боруссия» Д.        Германия                     17                    41800

17 «Астон Вилла»       Англия             19                    41681

18 ПСЖ»                                 Франция                      19                    41589

19 «Бетис»                  Испания                       19                    41558

20 «Реал»                               Испания                       19                    41304

21 «Эвертон»              Англия             19                    38886

22 «Челси»                  Англия             19                    37812

23 «Бенфика»              Португалия      17                    37004

24 «Аякс»                    Нидерландия   17                    36656   

25 «Лидс»                               Англия             19                        36308

26 «Лилль»                  Франция                      19                    34556

27 «Шальке»                Германия                     17                    33528

28 «Бавария»              Германия                     17                    33176

29 «Кёльн»                  Германия                     17                    32977

30 «Атлетик»               Испания                       19                    32949

Жаҳонгир МИРЗО тайёрлади