Пепе Рейна: «Ҳали юқори рақобатдан зерикканим йўқ»

Жаҳонгашта кипер кейинчалик клуб президенти Фернандо Роиг ҳамроҳлигида «сариқ сувости кемаси» аъзоси сифатида ОАВ вакиллари билан учрашди. Рейна нақ 17 йиллик танаффусдан кейин жонажон клубига қайтганини алоҳида айтиш керак.

Уйга қайтиш сеҳри

- Ҳозир бениҳоя хурсандман. Ўзи анчадан буён тезроқ қайтишни ўйлаётгандим. Умуман, «Вильярреал» либосини қайта кийиш насиб этишига заррача шубҳаланган эмасман. Тўғриси, фаолиятим учун бундан яхшироқ якунни топиш қийин. Ҳа, қўлқопларимни шу ерда михга илмоқчиман. Умид қиламанки, клуб ўсишдан тўхтамайди ва  нафақат Испания, балки бутун Европада эталонлигича қолади.

Клубга нисбатан туйғу

- Ўтган мавсум аввало, «Лацио» учун қайғурдим, шунинг баробарида «Вильярреал»дан ҳам асло кўз узганим йўқ. Юрагим тубидаги муҳаббат клубга бефарқ қарашимга йўл қўймайди. Қолаверса, «Вильярреал» тетик футбол кўрсатади. Жамоа айниқса, ЧЛда ҳурмат-эътибор қозонди. Энди шу клубдаман ва ўзимни жонажон уйимдагидек ҳис қиляпман. Янги мавсум ҳар бир турнирда янада муносиб из қолдиришни истаймиз.

Евроарена учун кураш

- Чемпионлик? Агар Ла Лигада ғолиб чиқсак, ақлдан озишим тайин. Лекин клубнинг асосий мақсади - евроаренага чиқиш. Нега энди ЧЛ ҳақида ўйламаслигимиз керак? Умуман, янги мавсумда Испания кубоги ва Конференциялар лигасида ғалаба учун курашиш - клуб олдига қўйилган икки қизиқарли вазифа.

Шахсий амбиция

- Ҳар қандай йўл билан жамоага ёрдам берсам, бас. Бунинг учун қаттиқ шуғулланишга тайёрман. Ягона мақсадим - бутун мавсум давомида клуб талабига мос даражада спорт формасини сақлаб қолиш. Тан оламан, Геро Рульи асосий дарвозабон ҳисобланади, мен эса унга рақобат тақдим этиш ва тажрибам билан жамоага ёрдам бериш учун келдим. Албатта, катта истиқболга эга ёш дарвозабонларга ҳам қўлдан келганича йўл-йўриқ кўрсатишга тайёрман.

Геро Рульи билан рақобат

- Албатта, ҳар кунлик соғ­лом рақобатдан умидворман. Бироз ҳаяжон йўқ эмас, лекин ишончим комил, дарвозабонлар ўртасидаги рақобат ҳаммамизга фойда келтиради. Геронинг ажойиб ўйинларини таъкидлашим жоиз. Жамоада 1-рақам унга тегишли эди, шунга қарамай, менга бермоқчи бўлди. Шунинг ўзи Рульи қандай йигит эканлигини кўрсатиб турибди.

Бирдам кийиниш хонаси

- Жамоа муваффақияти айнан кийиниш хонасидаги ҳолатга боғлиқ. Яхлит гуруҳ ҳар қандай алоҳида футболчидан устун. «Вильярреал»нинг бирдам оиласига муаммосиз қўшилишимга ишонаман. Барчамиз кучли, мустаҳкам ва камтарона кийиниш хонасига эга бўлиб, йўлни бирдам босим ўтишни истаймиз.

М.ПЎЛАТОВ тайёрлади