Трансферлар: Тайреллга тааллуқли тавсиф

Лига 1нинг ўтган мавсумини қониқарсиз ўтказган лионликлар мудофаа чизиғини кучайтиришга эҳтиёж сезгани айтилди. «Лион» таклиф этган 12 (бонус сифатида яна 3) миллион евро «Фейеноорд» раҳбарларига маъқул келганди. Навқирон футболчи мазкур жамоа рақибларининг ҳужумларини бартараф этиши кутилганди, лекин амалда бундай бўлмади.

«Манчестер Юнайтед» футболчи учун 17 миллион евро ва келгусида бонуслар беришини айтди ва Роттердам клуби мутасаддиларини ўз томонига оғдирди. «Фейеноорд» спорт директори Фрэнк Арнесеннинг сўзларига эътибор беринг: «Келишув амалга ошди. Энди Тареллни кутяпмиз. Агар у «ҳа» деса, «МЮ»га ўтиши муқаррар».

Маласия ўтган мавсум «Фейеноорд»да асосий фигуралардан бирига айланди, чемпионатда атиги иккита ўйинни ўтказиб юборди, 1та гол ва 4та самарали узатма муаллифига айланди. Сўнгги икки йил давомидаги иштироки эвазига Нидерландия термасидан таклиф олди, ҳозирга келиб, миллий жамоада 5та учрашувда майдонга тушишга ҳам улгурди. 2021 йилнинг сентябрида Черногория термасига қарши баҳсда (4:0) Маласия ассист қайд этди. Уэльс жамоаси билан ўйинда (2:1) ҳам шеригининг голига ҳаммуаллиф бўлди.

94-дақиқада, яъни уэльсликлар ҳисобни тенглаштиришганидан бироз ўтганида, 22 ёшли футболчи Воут Вегхорстни самарали узатма билан таъминлади. Айни пайт Луи ван Гал чап қанот ҳимоясида Дэйли Блиндни биринчи рақамли деб билади, аммо Маласия келгусида ушбу позицияни эгаллашга асосий номзод саналади. Овен Уэйндал унга бу борада бош рақобатчидир.

Гарчи «Фейеноорд» ўзаро икки учрашувда «Аякс»га имкониятни бой берган бўлсада (0:2, 2:3), қаҳрамонимиз ўзини кўрсатишни уддалади, амстердамликларнинг ёрқин вингери Антонига муносиб рақиб бўлди. «Маласиянинг ўйини кўрсатиб турибдики, у жуда керакли футболчи, - деди «Фейеноорд»нинг собиқ чап қанот ҳимоячиси Рууд Хойс. - Антони тезкор, Маласия ҳам. Антони чапдаст, Маласия ҳам. Демак, Маласия - куч. Унда ҳамма керакли сифатлар мужассам: тезкорлик, динамика, чаққонлик ва ажойиб техника».

Аслида, баҳс қанчалик юқори мақомга эга бўлса, Маласия шунчалик яхши ўйнайдигандек - бу эса «Фейеноорд»нинг Конференциялар лигаси финалига чиқишига замин ҳозирлади. Шундай экан, ҳар дам олиш кунлари интенсив ўйинларга бой ўтадиган Премьер-лига шароитида Тайрелл барқарорликка эришишига шубҳа йўқ. Йигитча АПЛ муҳитига мослашиш учун етарли жисмоний салоҳиятга эга. «Фейеноорд» собиқ устози Дик Адвокатнинг таъбирига кўра, Маласиянинг устунлиги унинг ҳам ҳужумда, ҳам ҳимояда бир маромда ўйнай олиши билан изоҳланади. Чидамкорлиги ва рақибга қаршилик кўрсатишга тайёрлиги эвазига «Фейеноорд» мухлислари унга «питбуль» лақабини беришган.

Қаҳрамонимизнинг ёшини инобатга олсак, футбол ўйнашни бошлаганида кимнинг ўйинини кузатганини англаш қийин эмас. У «Реал» аъзолари, ҳужумга қўшилиш ва ҳимояланишни бир маромда уддалайдиган чап қанот ҳимоячилари - Марсело ва Давид Алабанинг мухлиси ҳисобланади. «Маласия ҳамиша кучли ҳимоячи бўлган, энди эса унинг тўп билан муомалада яна ривожланаётганини кўришингиз мумкин», - дейди «Фейеноорд» мураббийи Арне Слот.

Англия футболидаги юқори темпга мослашиш - масаланинг бир жиҳати, буни устунликка эриша оладиган жамоа сафида амалга ошириш - бош-қа масала. Тайрелл юқори тезлиги эвазига ҳар қандай хатосини ювиши мумкин. Лекин адолат юзасидан тан олиш керак, Маласияга «Фейеноорд» сафида рақиблик қилган жамоаларнинг 90 фоизи Премьер-лигада ҳар икки ҳафтанинг бирида рақиблик қиладиган жамоалардан сезиларли фарқланади.

«Олд Траффорд»да мунтазам ўйин вақтига эга бўлмасликни оддий қабул қилиш мумкин. Зеро, Маласиянинг ягона рақобатчиси ҳисобланадиган Люк Шоу ўтган мавсум яхши тўп сурди, лекин у жароҳатланишга мойил. Яна бир чап қанот ҳимоячиси Алекс Теллес эса шу ёзда «МЮ»ни тарк этишга яқин.

Ҳар бир трансфер - бу таваккал. «Манчестер Юнайтед»-га ўтиш Маласиянинг ўсишига қандай таъсир ўтказиши мумкинлиги хавотирни вужудга келтирар, эҳтимол. Табиийки, 23 ёшга тўлиб улгурмаган йигитчанинг Эридивизидан Премьер-лигага кўчиб ўтиши даража жиҳатидан катта ўсиш. Тайрелл улкан иқтидор соҳиби бўлсада, ўз устида ишлашни давом эттирмоқда. Барқарорлик масаласидаги муаммо эса ёш футболчиларга хос. Шубҳа йўқки, Маласия бос-қичма-босқич салобатли чап қанот ҳимоячисига айланди, лекин уни Премьер-лигада камида кучли тўртликни кўзлайдиган жамоанинг бошланғич таркибига киришга нолойиқ деб ҳисоблайдиганлар ҳам топилади, албатта.

Маласия - қойилмақом дриблинг устаси. 22 ёшли футболчи ўтган мавсум ассистлар сони (6) бўйича фақат Душан Тадич (9) ҳамда Фредрик Мидтсе (7)дан ортда қолди. Аммо ундаги фаоллик кутилмаган муаммоларни ҳам келтириб чиқаради. Мисол сифатида «Венло»га қарши кечган баҳсни ёдга олиш мумкин: ўшанда ўнг қанотга кўчган Маласия тўпни йўқотиб, жамоаси гол ўтказиб юборишига сабабчи бўлганди.

Аммо Тайрелл ўз даражасини яхшилашига ишонгимиз келади. У ақлли ўйнайди, атрофида ҳам яхши инсонлар жамланган. Агар отаси бўлмаганида, қаҳрамонимизнинг «Манчестер Юнайтед»га ўтиши амалга ошмаслиги ҳам мумкин эди. «Футболчи ўйнаш иштиёқидан ташқари, интизом масаласи ҳам бор, - дейди у. - Мен шунчаки, майдонда тўп суришни хоҳлайман. Отам эса тўғри йўлни танлашимга ундаган. Ундан бағоят миннатдорман».

Эҳтимол, «Лион»га ўтиш ўсиш жараёнида фойдалироқ бўлиши мумкин эди (зеро, у ерда босим нисбатан камроқ). Лекин Жованни ван Бронкхорстнинг таъкидлашича, Маласия Англия чемпионатида ўйнашга тайёр. «Тайреллни ёшлар жамоасидаги иштирокидан яхши танийман. Унинг ҳаракатларини кўриб, ёш бўлишига қарамай, вазифасини аъло даражада бажараётганини кўрдим. Керак пайтда, рақибига қарши зич ўйнайди, шунингдек, муайян зоналарда ҳам ҳимоялана олади, - дея эслайди «Рейнжерс»нинг ҳозирги устози. - Чемпионлар Лигаси доирасидаги «Наполи»га қарши баҳсда Риджечиано Хапс жароҳат олганида, Маласияни майдонга туширишда муаммо кўрмаганман. Баъзан ортиқча асабийлашиш керакмас, шунчаки, йигитчага ишонч бағишлашнинг ўзи етарли».

Демак, юқоридаги фактларни ҳисобга олган ҳолда, Маласиянинг Англиядаги янги шароитга мослашиши, «МЮ»нинг муваффақиятли трансферларидан бирига айланишига ишонгимиз келади.

А.АБДУВАЛИХЎЖАЕВ тайёрлади