Скаутинг хизмати оқсаса...

«Браклар» кўп, реализация ва мудофаада катта муаммолар бор. Ҳа, омад келмаган вазиятлар ҳам бўлди. Аксинча, рақиблар   «шерлар»ни кечирган ҳолатларни ҳам кўрдик ўйин давомида...

*** 

«Пахтакор» ёзда ўз таркибига жалб қилганлардан фақат Мэттью Стинворден майдонга тушди ва ўйиндаги энг суст футболчилардан бири бўлди. Sarkisyan (SamvelKarlenich/397) айтаётгандек, қолганлар қани?

- «Легия» афсонаси Михал Кухарчик қани?

- «Пахтакор»га Германиядан келган қирғизистонлик Кими Мерк қани?

- Эронлик 23 ёшли ёш истеъдод Муҳаммадризо Кушки қани?

- Элдор Суюнов ва Санжар Қувватовга рақобатчи бўлиши кутилган Павел Павлюченко қани?

Аббос Файзуллаевни ушлаб қололмаганга яраша, унинг ўрнини муносиблар билан тўлдира билиш керак эди. Келганларга эса имконият берилмаяпти. Саволлар ҳаммага — Максим Шацкихдан тортиб, трансферларда қатнашган ва унга бош-қош бўлганларга. 
***
Айни пайт «Пахтакор» Суперлигада энг кўп легионерга эга жамоа. Ёзда «шерлар» сафига 5 нафар хорижлик футболчи қўшилди. Аммо улар орасида жамоадан кетган Аббос Файзуллаев ўрнини босувчи бирор футболчи йўқ. Нега? Келганлардан Кухарчик 52 дақиқа, Мерк 22 дақиқа ўйнади, Павлюченко ва Кушки эса ҳали майдонга тушишмади. Шацких қайсарлик қиляпти ёки бу легионерлар жуда сифатсиз. Савиясиз бўлишса, нега олиб келишди? Олиб келишдими, нега ҳеч қурса 90 дақиқа имконият беришмаяпти?!

Умуман, жамоа охирги пайтлар легионерларга сира ёлчимаяпти: Алексей Ларин ва Камен Хаджиев каби ҳимоячиларнинг ОЧЛда ёш болаларча йўл қўйган хатоларини эслаш кифоя. Адашмасам, ўша мавсумдан сўнг клуб бошқарувида кичик ўзгаришлар рўй берган, Жаъфар Ирисметов спорт директори лавозимидан кетганди. Муаммо эса кетмаган, демак, «рокировка»лар иш бермаяпти. Бундай пайт жамоа трансферлар сиёсатига жавоб берувчи киши (киши­лар) мардлик қилиб, истеъфо (ҳеч қурса, трансферлар ва жамоа келажаги юзасидан изоҳ) бериши керак эмасми? Бюджетдан (солиқларимиздан) ойлик ва бошқа харажат учун 7 млрд. сўм олишни билган клуб уни қандай футболчиларга сарфлашни ҳам яхши билиши керак. Шундай эмасми?