Қийин лекин, шу билан бирга муваффақиятли ўтган дебют мавсумидан сўнг, «Ливерпуль» футболчиси Федерико Кьеза таътилни мароқли ўтказиш мақсадида Италияга, Форте-дей Мармидаги шинамгина уйига қайтди. Аммо машғулотларни бир зум тўхтатиб қўйгани йўқ. «Қизиллар»нинг июль ойидаги йиғинига юқори спорт формасида боришни мақсад қилган вингер мураббийлар тузиб берган дастур бўйича шуғулланишда давом этмоқда. Италиялик ҳамкасбларимиз эса, Кьезанинг уйда эканлигидан фойдаланиб, у билан мазмунли суҳбат уюштиришга эришишди.
- Хориждаги дебют мавсумингизни сарҳисоб қиладиган бўлсак, «Ливерпул»да жуда кам ўйин амалиётига эга бўлдингиз, лекин жамоангиз билан бирга Премьер-лигада ғолиб чиқдингиз...
- Очиғи, ўтган мавсумдаги фаолиятимни ижобий баҳолаган бўлардим. Чунки Премьер-лига футболчилар ҳар куни ғалаба қозонадиган биринчилик эмас. Албатта, етарлича ўйин амалиётига эга бўлмаганимдан афсусланаман, лекин бутун бир мавсумни таҳлил қилиб чиқадиган бўлсак, менга АПЛда тажриба етишмади. Зеро, бундан беш йил олдин Флоренциядан Туринга кўчиб ўтдим ва фаолиятим фақат Италияда давом этаётганди. Англиядаги ўзгача маданият ва контекстда яшаш эса менга шахс ва футболчи сифатида ўсишимга катта ёрдам берди.
- Хўш Премьер-лига, «Ливерпуль» ва «Энфилд» - ҳаммаси сиз тасаввур қилганингиздек эканми?
- Яхши биласиз, кўпчилик АПЛни шиддатли лига дея таърифлайди. Лекин ўйинларда юқори сифат намойиш этилишини ҳам эсдан чиқармаслик керак. У ерда деярли ҳар бир жамоада кучли ҳамда учрашув тизгинини ўз қўлига ола биладиган етакчи футболчилар бор, ҳатто иккинчи даражали клубларда ҳам. Шунингдек, Премьер-лига ҳақида гап кетар экан «Ливерпуль» мухлисларини эътироф этмасликнинг иложи йўқ. «Энфилд»даги муҳитни тавсифлашга шунчаки тил ожиз. Салоҳ эса мутлақо ўзгача, бир сўз билан айтганда - «Олтин тўп» даражасидаги ўйинчи.
- У «Ювентус»да сиз билан бирга ўйнаган Криштиану Роналдудан ҳам яхшироқми?
- Менимча, Салоҳ бу йил «Олтин тўп» даражасида ўйин намойиш этди. Криштиануда эса бундай совринлардан бешта бор - фарқи шу. Агар имкони бўлса, иккаласини ҳам орзулар жамоамга киритган бўлардим. Улар биргаликда бир мавсумда бемалол 80та гол ура олишади...
- Аллегри сизни «Ювентус»да эркин ижодкор сифатида ўйнатганди. Арне Слот эса соф ҳужумчи ўрнида кўрмоқда. Балки келажакда Кьеза тимсолида отангиз (Энрико Кьеза) каби беназир форвард ўйинларидан баҳраманд бўлармиз?
- Ҳа тўғри, Аллегри қўл остида бутун мавсум иккинчи ҳужумчи сифатида ўйнардим ва голлар урардим. «Ливерпул»да эса вазифаларим бироз ўзгарди. Аммо кейинчалик Слот ҳам мени асосан шу позицияда синаб кўришга қарор қилди. Бундан эса ниҳоятда хурсандман. Негаки, ўз даврининг энг етук икки мураббийи мени ҳужумчи ортида ўйнашимни истамоқдами, демак бу чизиқда ўзимни нималарга қодирлигимни намоён эта оламан.
- Арне Слотнинг қандай мураббий эканлигини унчалик яхши билмайдиган италияликларга таърифлаб берсангиз?
- У Аллегрига ўхшаш менталитетга эга, аммо Нидерландиядан бўлгани учун бошқача методологиядан фойдаланади. Биламан, ўтган йили кўпчилик Слотга «Ливерпул»да қийин бўлишини тахмин қилганди. Лекин у замонавий футбол ғояларига эга ажойиб мутахассис эканлигини дарҳол исботлай олди. Натижада ортда қолган мавсум Премьер-лигада ҳақли равишда ғалаба қозондик.
- «Ювентус»дан кетишингизни қандай изоҳлайсиз?
- Ҳаммаси оддий. Клуб билан тузилган шартномам якунига етди ва ҳамкорликни давом эттириш бўйича аниқ таклиф олмадим. Аслида, биз бу мавзуни Европа чемпионатидан кейин муҳокама қилишга келишиб олгандик, аммо якунда ҳеч ким қўнғироқ қилмади. Таътилдан қайтгач, дарҳол Тиаго Мотта билан гаплашдим ва у очиқдан-очиқ ўзимга бошқа жамоа топишим кераклигини тушунтирди. Тўғриси, бундай муносабатни қабул қилиш осон кечмади. Чунки, жамоамга ҳали кўп нарса бера оламан деб ўйлардим. Шунингдек, «Ювентус» ва унинг мухлисларини қаттиқ ҳурмат қилардим.
- Демак раҳбариятнинг сизга нисбатан муомаласидан хафа бўлгансиз?
- Ундай демоқчи эмасман. Мен профессионал футболчиман ва мавжуд вазиятни тўғри баҳоладим. Ҳа, «Ювентус»да 4 йил тўп сурдим ва жамоа муваффақиятлари учун бор имкониятимни ишга солдим, аммо бу уларнинг қарори эди. Шунингдек, менга бошқа жамоа топгунимга қадар яхши шароитларда машғулот ўтказиш имконияти берилганидан миннатдорман. Аммо ўртоқлик учрашувларини ўтказиб юбордим барибир. «Ливерпул»да эса, барчасини бошидан бошлашим керак эди. Бу эса мавсум олди тайёргарлигимга салбий таъсир ўтказди.
- Италияни кўпроқ соғинасизми ёки терма жамоаними?
- Албатта миллий терма жамоани. Чунки, «Скуадра Адзурра» либосини кийиш ақл бовар қилмайдиган туйғу.
- Мунтазам ўйин амалиётига эга бўлиш учун Италияга, айтайлик «Милан»га қайтишга тайёрмисиз?
- Олдиндан бир нима дейиш қийин. Ҳозирда агентим, оилам ва мен «Ливерпуль» билан ажойиб муносабатдамиз. Мақсад - мавсумолди тайёргарликка жиддий эътибор қаратиш. Кейин эса ҳамма учун энг мақбул ечимни қидирамиз.
- Аллегри билан охирги марта қачон гаплашдингиз?
- Ўтган йили сентябрь ойида у менга қўнғироқ қилиб, «Ливерпул»даги фаолиятимга омад тилади. Бу даражадаги мураббийдан шундай олқишни ҳис қилиш жуда ёқимли эди. Бир пайтлар Соуза менга «А» Серияда дебют қилиш имконини берганди. Манчини билан эса, Европа чемпионатида етарли тажриба орттирдим. Лекин шуни алоҳида таъкидлайманки, футболчи ва шахс сифатида ривожланишимга айнан Аллегри катта таъсир кўрсатди.
- «Ювентус» фаолиятингиздаги ёпиқ саҳифага айландими, ёки қачондир яна Туринга қайтиб келасизми?
- Билмадим, буни вақт кўрсатади. Шиорим - ҳеч қачон ҳеч қачон дема.
- Янги мавсум учун қандай мақсадларни режалаштиряпсиз?
- Умид қиламанки, бу менинг мавсумим бўлади. Орзуим Италия терма жамоаси сафида жаҳон чемпионатида ўйнаш. Олдинроқ, бош жамоа билан Европа чемпионатида ўйнадим ва ғалаба қозондим. Энди навбат мундиални забт этишга!
- Кейинги мавсумда нечта гол уришни мақсад қилгансиз?
- Насиб қилса, бу сафар бир йилда урилган 10та голдан иборат чемпионат рекордимни ва 15та голдан иборат умумий рекордимни янгилашга ҳаракат қиламан. Лекин ишонаманки, бундан кўпроғини уддалаш ҳам қўлимдан келади. Мен оптимист футболчиман ва ҳар доим янги марралар сари интилишни хоҳлайман.
Манба: jufc.ru, Хуршид ЮСУПОВ тайёрлади
