КЛУБЛАР ЎРТАСИДАГИ ЖЧ-2026 ТОПИЛМАЛАРИ. Кутилган ҳолат: «Реал», «Манчестер Сити» ва «Бавария» клублари футболчилари Клублар ўртасидаги ЖЧ-2025 кашфиётлари рўйхатидан жой олишди. Умуман, сайёрамизнинг турли бурчакларидан АҚШга ташриф буюрган 32та жамоа таркибидаги бир қатор навқирон йигитлар мухлислар ва экспертларда чуқур таассурот қолдиришгани табиий ҳол. Демак, қуйида океан ортидаги майдонларда юксак салоҳиятини намойиш этган 7 нафар кашфиёт билан яна бирров танишиб чиқамиз (манба - soccer.ru).
Гонсало ГАРСИЯ («Реал»)
Клуб билан шартномаси 2027 йилнинг июнигача мўлжалланган. Transfermarkt порталида кўрсатилган трансфер қиймати: 8 млн. евро
Гонсало Гарсия КўЖЧ-2025га қадар «Реал» либосида онда-сонда майдонга тушадиган ва кўпчиликка нотаниш йигит эди. Қарангки, «Кастилья» сафида юксак натижаларга эришган 21 ёшли футболчи ёзги турнирда бирдан Килиан Мбаппе ўрнига майдонга тушдию, дарҳол ўзини кўрсата бошлади. Франциялик голеадор АҚШ сафари арафасида айниган товуқ гўштидан заҳарланиб, тана ҳарорати кўтарилиб кетгач, гуруҳ раундида майдонга тушолмади. Натижада Гарсия кутилмаган имкониятга эга бўлди ва бундан унумли фойдаланди. Дейлик, гуруҳ босқичида «Ал-Ҳилол» ва «РБ Зальцбург» дарвозасига гол уриб, кейинчалик «Ювентус» голкиперини ҳам ранжитганча «Реал»ни чорак финал сари етаклади. «Менда Гонсало борасида ҳеч қачон шубҳа туғилмаган. Унинг хатти-ҳаракати ва ўйинидан ҳам сира ажабланмадим. Зеро, Гонсало «Кастилья»да нималарга қодирлигини кўп марта намойиш этганди. У ўз имкониятини сабр билан кутиб, ўринли ҳаракатланадиган соф «9-рақам»дир. Албатта, жуда мамнунман, Гонсало шахсан менга Раулни эслатмоқда», - дея янги шогирдини мақтади жамоа бош мураббийи Хаби Алонсо. Дарвоқе, янги топилманинг асосий кумири - айнан Рауль Гонсалес.
Клаудио ЭЧЕВЕРРИ («Манчестер Сити»).
Клуб билан шартномаси 2028 йилнинг июнигача мўлжалланган. Transfermarkt порталида кўрсатилган трансфер қиймати: 18 млн. евро
Мавсумнинг каттагина қисмини захира ўриндиғида ўтказиб юборган Клаудио ниҳоят, «Ал-Айн»га қарши баҳсда «Сити»нинг бошланғич таркибига кирди ва аслида кўп нарсага қодирлигини амалда кўрсатиб қўйди. Ҳа, аргентиналик 19 ёшли йигит танаффусдан кейин жароҳат ортидан майдонга тушолмади, лекин 27-дақиқада жарима зарбасини голга айлантиргани билан назарга тушишга улгурди. Шуни инобатга олсак, янги мавсумда «Сити» мухлислари аргентиналик навқирон иқтидордан янада сермаҳсул ўйинлар кутишаётганди. Бироқ Хосеп Гвардиола йигитчани ижара келишуви асосида «Байер»га юборди.
Сенни МАЮЛУ («ПСЖ»)
Клуб билан шартномаси 2027 йилнинг июнигача мўлжалланган. Transfermarkt порталида кўрсатилган трансфер қиймати: 15 млн. евро
Франциялик ўспирин «ПСЖ»нинг КўЖЧ-2025 гуруҳ босқичидан ўрин олган «Атлетико», «Ботафого» ва «Сиэтл Саундерс» клубларига қарши 3та ўйинида ҳам иштирок этди. Шунингдек, «матрасчилар» дарвозасини ишғол қилишга муваффақ бўлди. 19 ёшли иқтидор ривожланишни шу суръатда давом эттирса, келажакда улкан муваффақиятларга эришади. Асосийси, Луис Энрике унга катта ишонч билан қарамоқда.
Леннарт КАРЛ («Бавария»)
Клуб билан шартномаси 2026 йилнинг июнигача мўлжалланган. Transfermarkt порталида кўрсатилган трансфер қиймати: 1,5 млн. евро
Венсан Компани «Окленд Сити»га қарши енгил ўйинда Леннартга «Бавария»нинг асосий таркибида дебют қилиш имкониятини тортиқ этди. Германиялик йигитча эса 17 ёшу 3 ойлик чоғи узатмалар аниқлиги бўйича 91 фоизлик кўрсаткич қайд этди, яна 6та яккакурашда устун келди. Тўғри, бу натижалар ожизгина кўринган «Окленд» ҳаваскорлар клубига қарши баҳсда қайд этилди. Шундай бўлсада, «Бавария» бош мураббийи Венсан Компани ўсмир футболчини алоҳида эътироф этди: «Ленни майдоннинг рақибга тегишли қисмида етарлича вазиятлар яратди. Унинг асосий устунлиги - шу. Умуман, Карлнинг дебют ўйини ҳам ўзи, ҳам «Бавария» учун ғоят фойдали».
Уоллес ЯН («Фламенго»)
Клуб билан шартномаси 2027 йилнинг декабригача мўлжалланган. Transfermarkt порталида кўрсатилган трансфер қиймати: 2,5 млн. евро
Маълумотларга кўра, «Лос-Анжелес» ва «Челси» дарвозаларига урилган голлар натижасида «Фламенго»нинг навқирон ҳужумчисига нисбатан қизиқиш кескин кучайди. 20 ёшли иқтидор турнирга қадар катталар жамоасида 15 мартагина майдонга тушганди. Кутилишича, Уоллеснинг Европанинг кучли лигаларидан бирига йўл олиши шунчаки, вақт масаласи, холос. Футболчининг «Фламенго» билан шартномасида кўрсатилган товон пули миқдори тайин - 40 млн. евро. Жамоа бош мураббийи Филипе Луиснинг фикрича эса, раҳбарият футболчини сотишда шошилмаслиги лозим: «Яннинг шартномаси хусусида ташвишланишга ўрин йўқ. «Фламенго» футболчининг тараққиётини диққат билан назорат қилмоқда. У биз учун ўта ишончли ижрочи, доимо мақсад сари интилади».
Тайрик ЖОРЖ («Челси»)
Клуб билан шартномаси 2027 йилнинг июнигача мўлжалланган. Transfermarkt порталида кўрсатилган трансфер қиймати: 10 млн. евро
Мухлислар томонидан «Саканинг ёвуз кўриниши» лақаби билан сийланган Жорж ёзги турнирда «Челси» фанатларида жуда яхши таассурот қолдирди. Умуман, ўтган мавсум футболчига АПЛда бир неча дақиқа имконият берилганида ҳам, у жуда таъсирчан ўйин намойиш этганди. Тайрикнинг клублар мундиалидаги энг ёрқин лаҳзаси «Эсперанс»га қарши ўйиннинг 97-дақиқасига тўғри келди - олис масофадан кучли зарба ва ҳайратомуз гол.
Жошуа АЧИМПОНГ («Челси»)
Клуб билан шартномаси 2028 йилнинг июнигача мўлжалланган. Transfermarkt порталида кўрсатилган трансфер қиймати: 8 млн. евро
«Челси» сафида Жорждан ташқари, яна бир ёш футболчи юксак салоҳиятини намойиш этди - Жошуа Ачимпонг. 19 ёшли иқтидор дейлик, ажойиб ҳаракатлари билан «Эсперанс» аъзоларини гангитиб, ўз устози Энцо Марескадан мақтовлар қабул қилди. «Бу оқшом Жош Ачимпонг ўйинидан чинакамига лаззат олдим. У яқин орада клубнинг фантастик футболчисига айланиши мумкин. Турли позицияларда бемалол ўйнай оладиган савияли ижрочи», - дея Ачимпонгдан мамнунлигини яширмади италиялик мураббий.
Жаҳонгир МИРЗО тайёрлади
