Ҳа, шунақасиям бўлади, баъзан футболчилар ҳали янги клубга ўтмасдан мухлислар нафратига мубтало бўлади. Келинг, мухлисларнинг норозилиги туфайли бекор қилинган йирик потенциал трансферларни эслайлик.
Марко Арнаутович
«Манчестер Юнайтед»нинг 2022 йил ёзида янги ҳужумчига бўлган умидсиз эҳтиёжи уларни Арнаутовичга олиб келди, бироқ 7 млн. фунт стерлинглик таклиф «Болонья» томонидан рад этилди. Илгари «Сток Сити» ва «Вест Хэм»да ўйнаган австриялик «Юнайтед»га ўтишга қизиққан бўлса-да, мухлислар унинг келишига қарши чиқишди. Арнаутович ўз фаолияти давомида бир қатор ирқчилик ҳодисаларига алоқадор бўлиб, мухлислар тўғридан-тўғри «МЮ» бош директори Ричард Арнольдга электрон почта орқали норозилик хабарларини юборишларига олиб келди. Бу ҳаракат ҳатто имконсиз нарсага эришди ва Гари Невиллни сўзсиз қолдирди: «Билмайман, бунга менда шунчаки изоҳ йўқ. «Юнайтед»нинг Марко Арнаутовични жамоага қўшиб олишга уринишлари ҳақидаги миш—мишлардан ташқари ҳар қандай мавзуга изоҳ беришим мумкин, лекин бу ҳақда айтадиган гапим йўқ».
Кўп ўтмай, «МЮ» Арнаутовичдан жимгина воз кеча қолди.
Криштиану Роналду
Роналду ҳар қандай лигада гол ура олишини исботлади — у битта чемпионат ёки жамоа ўйинчиси эмас. Ким ҳам Криштианудан воз кеча оларди? Лекин, у 2022 йилда «Манчестер Юнайтед»ни тарк этиш истагини билдирганида, ҳамма ҳам уни қўлга киритишни хоҳламади. «Челси» бош мураббийи Томас Тухель уни ўз жамоасида кўриш имкониятидан воз кечди, «Бавария» эса ҳатто бу футболчи билан масофа сақлашини билдирган иккита баёнотни эълон қилди. «Атлетико»ни ҳам Роналду билан боғлашди, аммо клуб мухлислари бу футболчи билан шартнома имзолашга кескин қарши чиқишди. Чунки Криш «Реал» билан уларга жуда кўп муаммоларни келтириб чиқарганди: «Криштиану Роналдуни имзолаш имконияти нуқтаи назаридан, агар бу шунчаки асоссиз миш-миш бўлмаса, биз унинг клубимизга қўшилишига тўлиқ норозилигимизни билдирамиз. Юқорида айтиб ўтилган ўйинчи «Атлетико»нинг ўзига хос хусусиятлари бўлган қадриятларга мутлақо зиддир — масалан, ҳаракат, сахийлик ва камтарлик. Ҳатто жуда даргумон фаразий ҳолатда ҳам, агар Криштиану Роналду каби ўйинчи бизга совринни кафолатлай олса, биз унинг имзоланишини қабул қилмаган бўлардик».
Шунингдек, «Атлетико» мухлислари «Нумансия» билан ўтган ўртоқлик ўйинида Роналдуга қарши баннерлар осиб қўйишди.
Стивен Жеррард
Жеррард 2005 йилда «Ливерпул»дан «Челси»га кўчиб ўтиши мумкин эди, аммо мухлислар унинг футболкаларини ёқишни бошлаганларидан кейин фикрини ўзгартирди.
Пол Погба
Полни «Манчестер Юнайтед»га иккинчи марта келишидан сўнг, кўпинча бошқа жамоага ўтиши билан боғлашди. Аммо унинг юқори класси ва жаҳон чемпиони мақоми ғазабланган «ПСЖ» мухлислари учун ҳеч нарсани англатмади. Франция терма жамоаси ўйинчиси учун 43 млн. фунт стерлинг таклиф қилинганлиги ҳақидаги миш-мишлар орасида парижлик мухлислар клуб базаси олдида қуйидагича мазмундаги баннер осиб қўйишди: «Погба, сен онангни тинглашинг керак. У сенинг бу ерда бўлишингизни хоҳламайди, биз ҳам хоҳламаймиз!»
Ярим ҳимоячи Париж марказидан тахминан 35 километр узоқликда жойлашган Ланьи-сюр-Марн шаҳрида дунёга келган, аммо хабарларга кўра, у болалигидан «Марсель» мухлиси экан. Ва табиийки, «ПСЖ» фанатлари бундай трансферга қарши чиқишган. Погба «МЮ»да қолди, 2022 йилда эса «Ювентус»га эркин агент мақомида қайтди.
Эл-Ҳожи Диуф
У жароҳатланган футболчиларга бақирарди, тупурди, масхара қиларди... Диуф Англияда экан, ҳамиша оломон ундан нафратланарди. Бироқ, бу сенегалликни «Болтон» ва «Блекберн»да ўйнатган Сэм Эллардайсни 2011 йилда «Вест Хэм»да кўрикка чақириши учун тўсқинлик қилолмади. «Аптон Парк»да юзага келиши мумкин бўлган реакция ҳақида сўралганда, Эллардайс шундай жавоб берди: «Аксарият мухлислар уни қаерда ижро этган бўлса ҳам қабул қилишганлиги сабабли, «Вест Хэм» мухлислари уни яхши кўришади. Диуф - сифатли ўйинчи, агар мухлислар уни майдонда ўз жамоалари тарафида кўришса, буни қадрлашади».
Ўша пайтда «болғачилар» Чемпионшипда қатнашган, аммо мухлислар шунда ҳам клубда Диуф учун жой йўқ, деб қарор қилишди. Унга шартнома таклиф қилинмади. Эллардайснинг изоҳи эса қуйидагича бўлди: «Албатта, клубдаги мухлислар билан боғлиқ вазиятни ҳисобга олишим керак эди».
Ўша йили ушбу жанжалкаш форвард Нил Уорнокнинг «Лидс»и билан шартнома имзолади.
Жоуи Бартон
«Вест Хэм» мухлислари яна бош планда! Улар 2015 йилда Жоуи Бартон клубга келиши мумкинлигини билганларида, буни олдини олиш учун бирлашдилар. Клуб «КПР»дан кетган жанжалкаш ярим ҳимоячини жамога қўшиб олишдан манфаатдор эди ва ҳатто мухлислар босими музокаралар натижасига таъсир қилгунга қадар у тиббий кўрикдан ҳам ўтганди. Лекин якунда мухлислар бунга йўл қўйишмади. Бартон эса трансфер бекор қилингандан сўнг шундай деди: «Мен хафа бўлмайман, келажакда ушбу футбол клубига омад тилайман».
Ли Бойер
2002 йилда «Лидс» вакили бўлган Бойер АПЛнинг энг яхши футболчиларидан бири бўлиб, Англия терма жамоасига киришга яқин эди. Шунинг учун у трансфер учун сўров юборганида, «Ливерпуль» унга қизиқиб қолди. Бироқ, Бойер ва «Ливерпуль» ўртасидаги шартнома бўйича музокаралар узоқ давом этди ва мухлислар ўз ташвишларини билдира бошладилар. Хавбекнинг «Лидс»даги осиёлик талабага ҳужум қилиш бўйича машҳур судда иштирок этиши (Бойер оқланди, кейин Вудгейт айбдор бўлди) унинг «Энфилд»га кўчиб ўтиши атрофидаги баҳсларни кучайтирди. Охир-оқибат битим бекор қилинди ва «Ливерпуль» баёнот берди: «Мураббий Жерар Улье футболчининг клуб учун ўйнашни хоҳлаши ёки хоҳиши борлигига амин эмас эди — бу «Ливерпул»нинг ҳар қандай ўйинчиси учун зарур бўлган фазилатлар».
Олти ой ўтгач, Бойер «Вест Хэм»га ўтди, у ерда мухлислар кутганидек, «Аптон Парк» стадиони олдида унинг имзоланишига қарши норозилик билдиришди, ўша йили у «Ньюкасл»да пайдо бўлди ва бир мунча вақт ўтгач, қўпол Ли Бойер юмшоқ фермерга айланди.
Манба: soccer.ru, МУҲАММАДХОН тайёрлади
