Жанлуижи Доннарумманинг қандай инсон эканлигини сал бўлсада ўрганишни болалик йилларидан бошлашни лозим топдик.
Жанлуижи 1999 йилнинг 25 февралида Италиянинг Кастеламмаре-ди-Стабия шаҳрида Альфонсо ва Маринелланинг оиласида дунёга келган. Бўлажак посбон оилада акалари Антонио ва Альфредо, шунингдек опаси Нунция билан улғайди. Қизиғи шундаки, Матвей Сафонов ҳам айнан 1999 йилнинг 25 февралида таваллуд топган. Бироқ бу Леонид Каневский айтганидек, бошқа воқеа. Бошқа кўпчилик дарвозабонлардан фарқли равишда, Жанлуижи қўлларида қўлқоплари билан ухлаган эмас ва буюк ўйинга болалигидан меҳр қўймаган. Доннарумма бу спорт тури билан тоғаси Эрнесто туфайли танишган, тоғаси уни Кастелламарре стадионига олиб борганди. Тез орада болакай оиланинг бахтига, футболга қизиқиб қолди. Кейин эса тиришқоқлик ва фидокорлик билан ўйинга мослашиб, номдоши бўлмиш Жанлуижи Буффоннинг ворисига айланди.
4 ёшли чоғида болакай «Наполи» клуби академиясидан жой олиб, дастлабки сабоқни тоғаси Эрнестодан олди. Буффон эса «кумир» бўлди. Ҳам номдош, ҳам буюк посбон, ва италиялик футболчи. Ҳаммаси аъло даражада! Ўша пайтда Жанлуижи 14 ёшда эди. Ундаги улкан салоҳиятдан «Ювентус», «Рома», «Удинезе», «Фиорентина» ва «Интер» скаутлари хабардор бўлишди. Бироқ ўсмир «Милан»да ўйнашни истарди. Чунки у шу жамоа мухлиси эди, акаси Антонио шу жамоада ўйнаган, аниқроғи, қабул қилинган, лекин ҳали майдонга тўшмаганди. Хуллас, танлов амалга оширилди, уни «Милан» тизимига қабул қилишди, «Наполи» клуби билан келишиб олишди. Жанлуижи Миланда доимо каттароқ ёшдаги гуруҳларда тўп сурди, чунки гавдаси нисбатан анча бақувват ва баланд эди. Лекин ҳатто унинг ўзи ҳам жуда қисқа вақт ичида бунчалик юксак даражага кўтарилишига ишонмаганди. Бунинг учун у нафақат ўзи, балки уни 16 ёшида асосий жамоага таклиф этган Филиппо Инзагидан миннатдор бўлиши лозим. Тўғри, аввалига у захира ўриндиғидан жой олди, лекин шу ёшда «Милан»нинг захирасида ўтиришини бир тасаввур қилингчи!
2015|16 йиллар мавсумида Жанлуижи асосий таркиб билан «А» Серияда дебютини нишонлади - бу 2015 йилнинг 25 октябрида бўлиб ўтган «Сассуоло»га қарши учрашув эди. Эртак бошланди - ўша куниёқ «Милан»дагилар янги юлдузга эга бўлишгани ойдинлашди.
Доннарумманинг майдон ташқарисидаги ҳаётига тўхталадиган бўлсак, у анча вақтдан бери маъшуқаси Алессия билан бирга яшайди. Уларнинг ишқий муносабатлари ўсмирлик даврида бошланган. Ривоятга кўра, бу Жанлуижининг дастлабки романи бўлган. Жуфтликка романнинг сўнггиси бўлишига тилакдошмиз. Севишганлар қай тариқа танишганлари ҳақида маълумотлар жуда оз.
Алиссия Жанлужидан атиги 2 ойга кичикроқ. У интерьерлар дизайни билан шуғулланади. Тахминан бир йил аввал жуфтликда фарзанд туғилди - унга Леонардо исмини беришди. Шундан кейин дарвозабон ўзининг иккинчи ярмига ниоҳдан ўтишни таклиф этди.
2023 йил июлида Доннарумма ва маъшуқаси билан мудҳиш ҳодиса юз берди. Унинг уйига босқинчилар кириб, уни калтаклашди, пичоқ кўтариб қўрқитишди.
«Тунги соат учда тўсатдан кишилар кириб келган уйда бўлиш - менимча, ўта ёмон туйғу. Мен қимир эта олмай қолдим. Алессия эса биз учун қимматли бўлган барча буюмларни беришга мажбур бўлди. Тафсилотларни айта олмайман, тергов ишлари кетмоқда. Ҳозир бўлиб ўтган воқеаларни тиклаш учун Франция полициясига бораман. Улар тинтув ўтказишлари учун эрталаб маъшуқам билан хонадонни бўшатиб бериб, вақтинча меҳмонхонага жойлашдик.
Қўрқув ўта кучли бўлди, лекин Алессияга нима бўлишини ўйлаш ундан ҳам кучлироқ эди. Мен кучсизланиб қолгандим, қўл-оёғим боғланган, ҳеч нарса қила олмасдим. Боз устига, француз тилини яхши билмаганим учун, уларга қаерда нима борлигини тушунтира олмасдим. Ҳозир ҳам қўрқувдан халос бўлмаган Алессия ҳам уларнинг ёнида эди», - деганди Жанлуижи кейинчалик.
Жанлуижининг отаси ташқи кўринишидан Италия мафиясини вакилига ўхшайди. Қайта-қайта такрорланган хабарларга кўра, ўғлига оид жиноий ишни у кўриб чиқаётган экан. Онаси - уй бекаси. Ўғли ўсмирлар жамоасида тўп сурган даврда айнан у мунтазам равишда фарзандининг туғилганлик гувоҳномасини олиб келган, Жанлуижининг фаолияти бунчалик тез ривожланишига ҳеч ким ишонмаганди. Бироқ у айнан Буффоннинг вориси бўлиш учун туғилганди. Акаси Антониони унинг шартномалари муддатини узайтиришга жалб этишгач, у «Милан» захирасида ўтириб, маош оладиган бўлди - идеал юмуш. Иккинчи акаси Альфредо ва опаси Нунция ҳақида деярли ҳеч нарса маълум эмас, улар жамоат ишларидан йироқлар. Италияда Альфредо Доннарумма номли футболчи бор. Лекин у шунчаки, фамилиядош, Жанлуижи ва Антонионинг акаси эмас. Жанлуижининг мучали балиқ. У жуда ювош ва сезгир йигит, журналистлардан узоқроқ юришга интилади. Лекин баъзан бунинг иложи бўлмай қолади.
Унинг хоббиси - оилавий мулоқот ва видео ўйинлар. Ҳозир татуировкалар яна урф бўлган. Қаҳрамонимиз бундан истисно эмас - Италиянинг Евродаги ғалабасидан кейин соврин тасвирини баданига тушириб олганди.
Энди Доннаруммани янги жамоа кутмоқда. Эҳтимол, у серёмғир Манчестерда касбдошларимиздан яширинишга уриниб кўрар...
ЖИЖО «СИТИ»ГА ЎТИШГА ЯҚИН
«Манчестер Сити» «ПСЖ» посбони Жанлуижи Доннарумма трансфери бўйича музокараларни давом эттирмоқда. Манчестер клуби 26 ёшли дарвозабон учун «ПСЖ»га тахминан 30 млн. евро тўлашга тайёр. Ушбу сумма битимни амалга ошириш учун етарли бўлиши кутилмоқда. Томонлар яқин кунларда келишувга эришишига ишонмоқда. Футболчи эса аллақачон «шаҳарликлар» билан шахсий шартномани келишиб олган. Таъкидланишича, дастлаб парижликлар италиялик футболчи учун 45-50 млн. евро талаб қилган, аммо раҳбарият ҳозирги шароитда уни арзонроққа қўйиб юбориш ҳам нотўғри қарор эмаслигини тушуниб турибди.
Манба: soccer.ru, МУҲАММАДСОДИҚ тайёрлади
