Колумбиялик Луис Диас узоқ давом этган музокара жараёни якунида «Ливерпул»дан «Бавария»га ўтди. Салоҳиятли вингер ушбу трансфер орқали АПЛ чемпиони ғазнасини қарийб 75 миллион еврога бойитди. Мюнхен жамоаси эса футболчи билан 4 йиллик шартнома тузди. Хўш, рекордмайстер оиласига қўшилган колумбияликнинг илк таассуротлари қандай? У «Бавария»да нималарни кўзламоқда?
Дастлабки
таассуротлари
- Ҳаммаси кутганимдан ҳам зиёда. Таассуротлар сўз билан таърифланмас даражада ажойиб. Шундай буюк клуб сафига кўшилганимдан бағоят хурсандман, албатта. Эндигина «Бавария» аъзосига айланган бўлсамда, ҳозирдан ўзимни худди уйдагидек ҳис қиляпман. Самимий қабул учун жамоадошларим ва клуб ходимларига алоҳида раҳмат.
«Бавария» ва Бундеслига танлови
- «Бавария»ни танлаганимнинг асосий сабаби? Барчаси жамоанинг шахсий мақсадларимга мос келадиган амбицияларга эгалиги билан боғлиқ. Шунингдек, Мюнхен клубининг буюк тарихи ҳам унинг либосини кийган исталган футболчида фахр туйғусини уйғотади. Маълумки, бу жамоа барча мусобақаларда фақат ва фақат ғалаба қозонишни хоҳлайди. Энди «Бавария»га қўлдан келганича ёрдам бериш асносида кўплаб совринларга эга чиқишни истайман.
Трансфер суммаси
таъсири
- Фаолиятимдаги жамоаларга ҳар жабҳада фойда келтиришни хоҳлайман. Лекин трансферим учун сарфланган пулга арзийманми-йўқ - буни билмайман. Албатта, «Бавария»нинг қатъияти ва мен учун шундай катта харажатга қўл урганидан хурсандман. Энди жамоа ўйинига имкон қадар тезроқ мослашиб, ишонч, эътибор ва харажатни оқлашим керак. Бошқа гап йўқ бу борада.
Майдондаги вазифаси
- Моҳиятан ҳужумда ҳам, қанотларда ҳам бирдек самарали ўйнашим мумкин. Лекин билишимча, Венсан Компани мендан чап қанот вингери сифатида фойдаланмоқчи. Бунга ҳеч қандай эътироз йўқ. Зеро, мураббийлар қаерда ўйнашимни лозим топишса, ўша нуқтада ўзимни кўрсатишга тайёрман. Муҳими, жамоа муваффақиятига ҳисса қўшсам, бас. Қувонтирадиган томони, ҳар доим энг яхши клубларда ўйнашни орзу қилардим ва бу амалга ошмоқда. Ҳозирги вазифам - янги муҳитга тезроқ мослашиш ҳамда клубга наф келтириш.
Арьен Роббен билан сурати
- Роббен билан Ливерпулда учрашгандик. У билан ёқимли суҳбатимиз ҳеч қачон ёдимдан чиқмайди. Ўша пайт мен учун «Бавария» афсонаси, ажойиб фазилатларга эга футболчи билан кўришиш, гаплашиш катта воқеаликка айланган ва буни сурат ёрдамида тарихга муҳрлагандим.
Флориан Вирцга омад
- Флориан Бундеслигада ўйинлар худди АПЛдагидек қизғин ва муросасиз кечиши, стадионлар ҳар доим мухлислар билан тўлишини айтиб, янги саёҳатда омад тилади. Ўз навбатида, мен ҳам ундан «Ливерпул»да улкан ғалабаларга эришишини кутаман.
Манба: fcbayern.com, Х.ЮСУПОВ тайёрлади
