Италия ва Сан-Марино фуқаролигига эга Марко Ражини - Африка ва Осиёдаги фаолияти орқали ном қозонган тажрибали мураббий. Болалар футболидаги муаммоларга қарши курашиш ва ёш истеъдодларни юзага чиқариш иштиёқи уни Тожикистон томонларга етаклади. Бугун эса Марказий Осиёнинг ушбу мамлакати U-17 терма жамоаси 58 ёшли Ражини бошқарувида 3 ноябрь куни Қатарда старт оладиган ўсмирлар тоифасидаги кичик мундиалга шайланмоқда. Италиялик мутахассис муҳим мусобақа олдидан ФИФА расмий сайтига махсус интервью бериб, ўз режалари билан ўртоқлашди. Марконинг айтишича, у Тожикистон футбол федерацияси билан келишувга эришган заҳоти мамлакат ўсмирлар терма жамоасини жаҳон чемпионатига олиб чиқиш ҳақида ўйлай бошлаган экан.
Эзгу ният билан бошланган иш хайрли бўлади: Марко Ражини қўл остидаги жамоани ўтган йили Саудия Арабистонининг Жидда шаҳрида ташкиллаштирилган U-16 тоифасидаги Осиё кубогига муносиб тайёрлади ва тожикистонликлар гуруҳ босқичини 1-ўринда якунлашди. Италиялик мураббий шогирдлари чорак финал ўйинида анча кучли рақиб - Жанубий Корея термасига ҳам муносиб қаршилик кўрсатишди, фақат пенальтилар сериясида омад корейсларга кулиб боқди. Муҳими, Қатарда меҳмон бўладиган кичик мундиалнинг 8та йўлланмаси ОФК вакилларига ажратилгани эвазига тожикистонлик ўсмирлар мамлакат тарихида 3-марта U-17 белгиси остидаги ЖЧда иштирок этиш ҳуқуқини қўлга киритишди. «Саудияда пенальтилар серияси бўйича ютқазиб, ярим финалга чиқолмаган бўлсакда, Тожикистон термаси шунчаки, машғулот ўйини учун рақиб эмас, балки юқори даражада рақобатлашадиган куч эканлигини тўла исботлагандик, - дейди Марко Ражини. - Иш жараёнида бутун тажрибамни ёш йигитлар билан баҳам кўрдим. Моҳиятан ҳар бир футболчи майдонда нима қилиши кераклигини тўлиқ тушуниши шарт. Буни талаб даражасида англаш учун эса ҳақиқий профессионаллик талаб этилади. Ҳа, футбол майдонда ўйналадиган спорт тури, аммо унинг атрофида кўплаб жиҳатларни тўғри йўлга қўйиш керак: футболчиларга ғамхўрлик қилиш, уларни ҳар томонлама назорат остига олиш, машғулотлар жараёни, видеотаҳлиллар, тактик дарслар... Буларнинг барчаси аллақачон ҳаёт тарзимга айланиб кетган. Оддий айтганда, қаерда ишламайин, боримни бераман ва бундан роҳатланаман ҳам».
Марко Ражинининг мураббийлик йўли чиндан ҳам, ўзига хос чизгиларга тўла. У Италиянинг энг нуфузли мураббийлик мактаби - Коверчанода Роберто Баджо, Паоло Мальдини ва Фабио Каннаваро каби афсоналар билан бирга таҳсил олган. Марко кейинчалик Сан-Марино, Чехия, Словакия, Литва, Конго ДР, Нигерия, Мўғулистон, Малайзияда фаолият юритиш асносида оғир-машаққатли йўлни босиб ўтди. Мана, энди Тожикистон футболи тараққиётига озми-кўп ҳисса қўшиш ҳаракатида. Ҳа, Ражини ҳозирга қадар асосан футбол нуқтаи назаридан кичик мамлакатларда ишлади. Муҳими, экзотик ўлкаларда мураббийлик билан шуғулланиш унга ўзгача завқ улашади: «Табиатан салоҳиятимни миллионлар ўйини ҳали юқори даражага кўтарилмаган мамлакатларда синаб кўришни ёқтираман. Ҳудудлардаги иқтидорларни ривожлантириш, уларда курашувчан характер шакллантириш ва ёшларга чинакам орзу қилиш имкониятини бериш жуда мароқли. Мана, фаолиятим давомида бир қатор экзотик мамлакатларда ишладим. Асосийси, қаерга борсам ҳам, маҳаллий футбол ривожи йўлида қўлдан келганича изланаман ва бу билан фахрланаман».
Марко Ражинини олдинда яна бир масъулиятли мусобақа кутиб турибди. Унинг вазифаси - Тожикистон U-17 терма жамоаси ноябрь ойи бошида Қатарда старт оладиган ўсмирлар ўртасидаги жаҳон чемпионатида муносиб иштирок этишини таъминлаш. Тожикистонлик ёш футболчилар «I» гуруҳида АҚШ, Буркина-Фасо ва Чехия термаларига қарши баҳс олиб боришади: «Тожикистонда бор-йўғи 10 миллион аҳоли бор. Биз эса бўлажак турнирда нисбатан катта мамлакатлар вакиллари билан дуч келамиз. АҚШда қанча аҳоли борлигини айтиш шарт эмас, ҳатто Буркина-Фасо ва Чехияда ҳам бугунги кунда 30 миллионга яқин одам истиқомат қилмоқда. Чехия эса бой футбол тарихи ва кўплаб афсоналарга эга мамлакатдир. Демакки, рақибларга катта ҳурмат билан ёндашишимиз керак, лекин ҳеч биридан чўчимаймиз. Шахсан мен шогирдларимга тўлиқ ишонаман. Очиғини айтаман, мусобақа стартигача оз муддат қолгани сайин ишлар кўпаймоқда. Доимий машғулотлардан ташқари, ҳар куни бўлажак рақибларни ўрганиш, уларни мағлубиятга учратиш йўлларини излаш ва ўйинимизни кучайтирадиган энг мақбул стратегияларни татбиқ этиш... Қатарда худди Осиё кубогида бўлгани каби биринчи ўйин биз учун ҳал қилувчи аҳамият касб этиши мумкин. Шунингдек, мазкур мусобақа тожикистонлик иқтидорлар учун жаҳон миқёсида кўзга ташланиш имконияти, албатта. Умумий хулосамга кўра, жамоа таркибида катта клубларга ўтиш йўлида муҳим қадам ташлашга тайёр 3-4 нафар иқтидор бор. Агар шу йигитлар Европада ўйнашни истасалар, ҳали кўп нарсаларни ўзлаштиришлари, турли шароитларга мослашиш инстинктини ҳосил қилишлари керак. Асосий гап шуки, ҳозир айрим шогирдларимда улкан салоҳиятни кўряпман ва улар жаҳон чемпионатида ёрқин ўйин намойиш этишларига ишонаман. Жамоа мақсадига келсак, натижага алоҳида эътибор қаратамиз, албатта. Дейлик, бўлажак мундиал шахсан мен учун фаолиятимнинг юқори чўққиси ҳисобланади. Шундай экан, унда яхши натижа қайд этишимиз жуда муҳим. Ҳозирги асосий вазифа - гуруҳдан чиқиш. Агар буни уддалай олсак, ишонаманки, Тожикистонда барча мухлислар чексиз ғурур ва мамнунликни туйишади».
ТОЖИКИСТОН ЎСМИРЛАР ТЕРМА ЖАМОАСИНИНГ ЖЧ-2025
ДОИРАСИДАГИ ЎЙИНЛАРИ
(«I» ГУРУҲИ)
1-тур. 5 ноябрь (чоршанба)
ТОЖИКИСТОН - ЧЕХИЯ
2-тур. 8 ноябрь (шанба)
АҚШ - ТОЖИКИСТОН
3-тур. 11 ноябрь (сешанба)
БУРКИНА-ФАСО - ТОЖИКИСТОН
Манба: fifa.com, Х.ЮСУПОВ тайёрлади
