Еврофутболда клублар учун ЧЛдан муҳимроқ ва аҳамияти баландроқ турнирнинг ўзи йўқ. «Челси»нинг бугунги сардори Рис Жеймс буни болалигидан яхши билади. Ҳа, Лондон клуби 2012 йили ўз тарихида илк марта ЧЛнинг «шалпангқулоқ» кубогини қўлга киритган вақт Жеймс ёш йигитча эди. 2021 йили эса «аристократлар» Порту шаҳрида ташкил этилган ЧЛ финалида «Манчестер Сити»ни мағлубиятга учратишди ва бутун фаолиятини «кўклар»га бағишлаётган Рис танловда адашмаганига амин бўлди.
- Рис, мана, «Челси»нинг ЧЛда ғалаба қозонганига 4 йил бўлибди. Ҳозир эса жамоа сардори ролида шерикларингизни янги саргузаштлар сари етаклаяпсиз. «Челси» Европа клублари учун энг муҳим турнир саналган ЧЛда нималарни кўзламоқда?
- ЧЛга 2 йиллик танаффусдан сўнг қайтганимизни ҳисобга олсак, таркибдаги ҳар бир футболчи иштиёққа тўла. Оддий айтганда, биз Европадаги энг нуфузли турнирда энг кучли жамоалар билан баҳслашишга тайёрмиз. Умуман, мусобақага қайтганимиздан хурсандмиз. Нимани кўзлаяпмиз? Ҳозир аниқ маррани тилга олишимдан маъно йўқ. Нима бўлишидан қатъий назар, ҳар бир баҳсда ғалаба учун ўйнаймиз, бундан нима чиқишини эса вақт кўрсатади.
- Айтиш керак, «Челси» охирги вақтлар Европанинг энг кучли клубларини енгиш ҳадисини яхши ўзлаштириб олди. Масалан, ўтган мавсум ақлга сиғмас ўйинлари билан ЧЛ ғолибига айланган «ПСЖ» ҳам Клублар ўртасидаги ЖЧ финалида сизлардан енгилгина тарсаки қабул қилиб олди. Жамоа сардори сифатида айтингчи, жорий мавсум ҳам катта ғалабалар сари дадил қадам ташлай оласизларми?
- Болалигимдан «Челси»ни сардорлик боғичи остида майдонга бошлаб тушишни орзу қилганман, айниқса, ЧЛда. Тўғри, турнир форматининг ўзгаргани биз учун янгилик, лекин жамоамиз мусобақада бош соврин учун курашишга қодир. Бошқалар нима дейишлари мен учун аҳамиятсиз. Билганим шуки, агар ўз кучимизга тўлиқ ишонсак, турнирда ғалаба қозониш нечоғли аҳамиятли эканлигини тушунсак, унда мақсадга эриша оламиз. Асосийси, агар ҳамжиҳат ўйнасак, ҳар қандай рақибга жанг таклиф этишимиз, узоқроққа боришимиз мумкинлигини биламиз. Муҳими - шу.
- Биламизки, «Челси» тизимига қабул қилинишингиздан анча олдин жамоага мухлислик қила бошлагансиз. 2019 йили эса «Лилл»га қарши ўйинда ЧЛдаги дебютингизни нишонладингиз, ўша мавсум «Аякс» билан бўлган унутилмас баҳс- (4:4)да ЧЛ тарихида гол урган энг ёш футболчига айландингиз. Ўша голни эслаб турасизми?
- Тўғриси, рақиб жарима майдони ичига қандай бориб қолганимни англамаганман. Кейин тўп бирдан менга тушди ва гол урдим, қарангки, орзум амалга ошди! Бундай катта турнирда муҳим гол уриб, «Стэмфорд Бриж» атмосферасини ўзгартириб юбориш - ақл бовар қилмас ҳодиса. Шундай экан, ўша голни унутишим мумкинми?
- Яна 2 йилдан сўнг «Челси» ЧЛ финалида қудратли «Манчестер Сити»ни енгди, бу вақтда жамоанинг асосий футболчилари қаторига қўшилишга улгургандингиз...
- ЧЛда шоҳсупага кўтарилиш ортидан тасаввурга сиғмас даражада ҳиссиётлар туғён уришини айтишим шарт эмас - ажойиб туйғу. Ўша мавсум кўпчилик ғалаба қозонишимизни кутмагани рост. Ҳатто ҳар бир раундда бизга жуфтлик аутсайдери сифатида қарашганди. Айниқса, финалда. Амалда эса барчасини уддалаб, ғалабага эришдик. Тан оламан, ЧЛда бунчалик эрта чемпион бўлишни ўйламагандим. Умид қиламанки, яқин орада аввалги ёрқин хотираларни жунбушга соладиган яна бир катта муваффақиятга эришаман. Оддий айтганда, «шалпангқулоқ» кубокни қайта қўлга олмоқчиман - бу энг ажойиб оқшом бўлади.
Манба: chelseafc.com, М.ПЎЛАТОВ тайёрлади
