«Динамо» - «Машъал» (1:0) учрашувидан сўнг меҳмонлар бош мураббийи Асрор Алиқулов матбуот анжуманида иштирок этиб, фикрларини билдирди.

«Биринчи бўлимда Суперлига старти билан боғлиқ футболчиларда ҳаяжон кузатилди. Киришиб кетишда қийинчиликларга дуч келдик. «Динамо»нинг кучли томони қанотлар. Биз кўпроқ қарши ҳужум мақсади билан режа тузгандик. Бўлим охирида ўтказиб юборилган гол бошқачароқ услубга олиб келди. Вазиятлар ярата олдик, бироқ гол уриш насиб этмади. Биринчи ўйин учун ёмон ўйин кўрсатмадик. 

Режаларимиз? Шароит борасида муаммо йўқ. Биз Суперлигада энг кам сметага эга бўлган клублардан биримиз, бироқ бу амалда ҳеч нарсани англатмайди. Клуб учун қўйилган талаб Суперлигага чиқдикми, муносиб ўйнаш. «Машъал» барибир ўзининг аввалги мавқеъига қайтади. 

Академиямиз ёпилаяптими? Қийинчиликлар бўлгани рост. Лекин ҳозир академия тўлиқ ишламоқда», - дея Асрор Алиқуловнинг сўзларини келтирган клуб матбуот хизмати.