Охирги йиллар ҳар бир янги мавсум арафасида муайян ҳужумчи трансфери ҳақида миш-мишлар тарқалиши ва уни дарҳол Эрлинг Холанд билан таққослаш одат тусига кирди. Бу йилги қаҳрамон - Беньямин Шешко. Бўйи деярли 2 метрга тенг баҳайбат словениялик жуда тезкор, яна зарбаси кучли. Хўш, «МЮ»нинг янги ҳужумчиси ўйин ва гол уриш бобида ҳам Холанд билан тенглаша оладими? Аввало, айтиш керак, чин голеадор қидираётган Манчестер жамоаси Шешко трансфери учун «РБ Лейпциг»га нақ 76,5}8,5 млн. евро тўлайди. 22 ёшли ҳужумчининг ўзи билан эса 2030 йилгача мўлжалланган шартнома расмийлаштирилди. Дарвоқе, бунга қадар Германия клуби «Ньюкасл»нинг 82,5}2,5 млн. еврони ўз ичига олган таклифини қабул қилганди, аммо Беньяминнинг ўзи «МЮ»ни маъқул кўрди. Маълумот учун, Шешко ўтган мавсум Бундеслиганинг 33та ўйинида 13та гол урганди.
***
Бу трансферда 2та муҳим жиҳатни тушуниш лозим. Биринчидан, Шешко - чиндан ҳам, катта иқтидор. Иккинчидан, у ҳали ҳар мавсум 20талаб гол урадиган форвард эмас. Лекин тезда шундай даражага кўтарилиши мумкин. Назарий жиҳатдан қарасак, «Юнайтед» бундай янги куч учун муносиб вариант. Шешко «РБ Лейпциг»даги илк мавсумда ҳужумларни якунловчи соф ижрочи сифатида кўзга ташланди. Яъни дарвозага яқин ҳудудда ҳаракатланди. Мисол учун, Бундеслигадаги 14та голидан 13тасини жарима майдони ичидан урди. Қолаверса, 90 дақиқада ўртача 0,82та гол ҳосил қилган словениялик маҳсулдорлик бобида чемпионатда фақат Гарри Кейн ва Серу Гирассидан ортда қолди, холос. Ҳаммаси мантиққа мос тушади: улкан гавда, юқори тезлик, ҳар икки оёқ ва бош билан яхши зарба. Аммо иккинчи мавсумда баъзи нюанслар қўшилди. Йигитча жарима майдони ичидан кўпроқ четга чиқди, тез-тез орқага чекинди, қулай позициялардан камроқ зарба берди. Рақамларда айтсак, бу сафар атиги 63 фоиз зарбаси жарима майдони ҳудудларига тўғри келди (лига тўпурарлар орасида энг паст кўрсаткич). Табиийки, бу «қотил» голеадор статистикаси эмас. Қисқаси, Шешко ўзига ўзи вазият яратувчи ҳужумчига айланди.
***
Майдондаги роли кескин ўзгарган бўлсада, Шешконинг голлари сони камаймади, ҳисоб (14та ўрнига 13та урди). Ваҳоланки, ўйин вақти нақ 15 соатга қисқарди. Ҳа, йигитчанинг майдондаги хатти-ҳаракати ўзгарди, аммо зарбалари сифати сақланиб қолди. У ҳали ҳам йўқ жойдан гол яратишга қодир. Оддий айтганда, Шешко қойилмақом юришдан кейин (ёки жарима майдони ташқарисидан) мунтазам гол урадиган кам сонли ҳужумчилар тоифасидан. Асосийси, у ҳар қандай вазиятда икки оёғида бирдек «ўқ» уза олади. Дейлик, 2 мавсумдаги 27та голидан: 13таси ўнг, 6таси эса чап оёқ ва 8таси бош билан берилган зарбалар маҳсулидир. Ноёб баланс. Аммо бу унинг элит якунловчи ҳужумчи эканлигини англатмайди. Беньямин охирги мавсум xG бўйича атиги 2,7 кўрсаткичини қайд этди. Таққослаш учун, 1 йил олдин бу рақам 6,3 бўлганди. Яъни Шешко xG буйича «меъёр»га қайтди. Аммо ташвишли ҳолат ҳам йўқ эмас - ёш ҳужумчи ҳамма хоҳлаган даражада яхши позицияга чиқмаяпти, шунчаки. Мисол учун, 90 дақиқага тўғри келадиган xG кўрсаткичи 0,31ни ташкил қилди. Дейлик, Жошуа Зиркзеда ҳам худди шундай натижа. «Юнайтед» ҳаётидан эса биламизки, мухлислар бундай кўрсаткичдан ҳайратланишмайди.
***
Шунингдек, Беньямин ҳали барқарор эмас. Оддий мисол, у мавсум-2023|2024даги голларидан ярмини кетма-кет 7та ўйинда нишонлаганди. Кейинги мавсум эса орада 8та ўйинда 7та гол урди. Шунинг баробарида йигитча 10та турда атиги 1та гол урган давр ҳам кузатилди. Ёш ҳужумчи учун одатий беқарорлик. Тўғри, Шешко эътибордан четда қолдириш қийин фазилатларга эга, барибир. У ҳозирнинг ўзида АПЛдаги аксарият ҳужумчилардан тезкорроқ, тўп билан яхши ишлайди, чуқурроқ кириб бориш ва комбинацияларда қатнашишдан чўчимайди. Умуман, Беньямин дейлик, узатмалар учун тайёр «симёғоч» эмас, балки юқори интеллект соҳибидир. Унинг тўпсиз ҳаракати ҳам - катта плюс. Яъни ўзи вазият яратади ва агар яқин атрофида ақлли тезкор шерик топилса (масалан, Брайан Мбемо аллақачон «МЮ» сафига қўшилди), рейд учун кўпроқ бўшлиққа эга бўлади. Айтганча, Мбемо тўп билан югуриш бўйича АПЛда энг юқори натижага эга. Қисқаси, очиқ зонага чиқишни яхши кўрадиган, лекин ҳар доим ҳам тўп сўрамайдиган форвард учун ажойиб тандем!
***
Эҳтимолки, Шешкодан бирданига 20та ёки кўпроқ гол кутиш нотўғридир. Ахир у ҳали Эрлинг Холанд эмас. Дейлик, Беньямин жарима майдони ичидаги жойлашув бўйича ҳам беқарор ва агар «МЮ» тизимли ҳаракат эмас, инерция билан ҳужум қиладиган жамоалигича қолса, йигитча шунчаки, йўқолиб қолиши ҳеч гап эмас. Лекин бир жиҳатни назардан қочирмаслик лозим. «Арсенал» тайёр ҳужумчига эҳтиёж сезаётганди ва Виктор Дьокерешни олди. «Юнайтед» эса келажакка пул тикаётгандир. Шу нуқтаи назардан қарасак, Шешко - юқори сифатли «хом» маҳсулот. Тўғри, уни дарҳол бошланғич таркибга киритиш мумкин, ахир гол уришни яхши билади, лекин юқори чўққиси ҳали олдинда. Агар «МЮ»да йигитчага шунчаки, чиройли гол уриш эмас, балки доимий равишда уришни ўргата олишса, у худди Эрлинг Холанд каби «йиртқич»га айланади, албатта. Агар акси бўлса, унда Шешко ҳам шунчаки, «истиқболли» сифатидан нарига ўтмаган ҳужумчилар қаторига қўшилади, тамом... Ҳозирча у ўртада, лекин бу ҳам юқори даража, барибир!
Манба: sports.ru, МУҲАММАДСОДИҚ тайёрлади
