АЁЛЛАР ФУТБОЛИ: Диққат, майдонда Европа маликалари!

«Олтин тўп» соҳиблари, Мбаппени хурсанд қилган ҳужумчи ва беш йиллик танаффусдан сўнг термасига қайтган норвегиялик афсона... Кеча - 6 июль куни Англияда - «Олд Траффорд» стадио­нида аёллар терма жамоалари ўртасидаги Европа чемпионатига старт берилди. Келинг, бир кўриб чиқайлик Евро-2022ни чинакамига ёндирадиган кимлар бор экан.

Алексия Путельяс  (Испания)

Алексия Путельяснинг номи кўпчиликка маълум - «Барселона» ярим ҳимоячиси ўтган мавсумда «Олтин тўп»ни қўлга киритганди. Бу йил у дунёнинг энг қиммат ўйинчиси бўлди, трансфер нархи 600 минг евро. Ўтган мавсумдаги ЕЧЛда энг кўп голни у урган (11та), Ла Лигада «гол}пас» тизимида 18}15 натижа кўрсатди.

Пернилле Хардер    (Дания)

Хардер Дания терма жамоаси сардори ва «Челси» футболчиси. У икки марта Европанинг энг яхши футболчиси деб тан олинган (2018 ва 2020 йилларда), Дания термасининг рекордчи голеадорига айланди - 131 ўйинда 67та гол.

Мари-Антуанетт Катото (Франция)

«ПСЖ» ҳужумчиси Катото қишда 108та гол билан клуб тарихидаги энг яхши тўпурарга айланди. Ва у эндигина 23 ёшда. «ПСЖ»нинг «ЮТуб»даги каналида Мбаппе ва Катото бир-бирларининг голларини томоша қилаётгани ва мақтагани видеоси машҳур бўлиб кетди.

Магдалена Эрикссон (Швеция)

Магдалена ушбу рўйхатдаги ягона ҳимоячи бўлиб, у «Челси»да ўйнайди. Энг сўнгги ютуқларидан бири - Токиодаги Олимпия ўйинларининг кумуш медали. Эрикссон - АПЛнинг ёрқин ўйинчиларидан.

Вивиан Мидема (Нилерландия)

Нидерландия терма жамоаси амалдаги Европа чемпиони ва жаҳоннинг вице-чемпиони ҳисобланади, Вивиан Мидема эса дунёнинг энг таниқли ҳужумчиларидан бири. У терма жамоа тарихидаги энг яхши тўпурар - 101 ўйинда 84та гол урган, «Арсенал»да ҳам энг кучлилардан бири ҳисобланади.

Лике Мартенс (Нидерландия)

Нидерландия термасидаги яна бир супер футболчи. «Барселона» ярим ҳимоячиси, 2017 йилнинг энг яхши футболчиси, финалдаги голлардан бирининг муаллифи ва сўнгги Европа чемпионатининг энг яхши футболчиси.

Ада Хегерберг (Норвегия)

Ада Хегерберг - афсона. Мана нима учун: у аёллар ўртасидаги «Олтин тўп»нинг илк совриндори, ЕЧЛ тарихидаги бош тўпурар (53та гол) ва дунёнинг энг кучли аёллар жамоаси - Франциянинг «Лион» клуби етакчиси. Евро-2017дан сўнг бир можаро билан термада танаффус қилди. Мана, беш йил ўтиб, Ада яна термага қайтди.

Свейндис Жейн Йонсдоттир (Исландия)

Свейндис бу мавсумда «Вольфсбург» билан Бундеслигада ғолиб чиқди. Евро-2022нинг энг истиқболли ўйинчиларидан бири деб эътироф этилмоқда ва Англияда ёрқин ўйин кўрсатиши кутилмоқда.

Бет Мид (Англия)

Бет «Арсенал»нинг марказий ҳужумчиси ва инглиз жамоасининг асосий ўйинчиларидан бири ҳисобланади. У Евро-2022 саралаши доирасидаги ўйинларда 20дан ортиқ гол урган ва жорий мавсум Суперлигада 11 бор рақиблар дарвозасини ишғол қилган.

Александра Попп (Германия)

Александра Попп - ҳужумчи, Германия терма жамоаси сардори, «Вольфсбург» билан уч карра ЕЧЛ ғолиби, Олимпия чемпиони ва юртида ҳамма учун муҳим шахс. Термаси сафида 113та ўйинда 53та гол урган.

МУҲАММАДХОН тайёрлади