Савол: Жозе Моуриньонинг мавсум-2021|2022даги фаолиятига қандай математик белги қўйиш керак - минусми ёки плюс?
Бу бир қарашда ўта жўн, иккинчи томондан анча мураккаб масала. Биринчидан, «Рома» бошқарувини қўлга олган португалиялик Италия «А» сериясида кутилган натижани таъминлай олгани йўқ. Иккинчидан, «Беназир» ўз коллекциясига яна бир еврокубокни қўшиб қўйди. Ҳа, Конференциялар Лигаси Европада грандлар тан оладиган турнир эмас, аммо факт шуки, бу еврокубок, барибир.
ЭНДИ ТОП-4 ҲАМ ОРЗУ...
Жозе Моуриньо ёхуд «Беназир»нинг мураббийлик фаолияти олдингидек эмаслиги тайин. Ҳар ҳолда, португалиялик мутахассис «А» серияда «Рома»ни Рим кутган даражага кўтара олгани йўқ. Ҳа, «бўрилар» унинг бошқарувида Конференциялар Лигаси ғолибига айланишди, лекин бу бошқа масала. Бинобарин, римлик тиффозилар Элдор Шомуродов жамоасидан аввало, «А»да юксалишни кутишганди. Якуний 6-ўрин эса улар кутган натижа эмас, албатта. Чунончи, Моуриньони Римга жамоани лоақал совриндорлар қаторига етаклашидан умидвор ҳолда таклиф этишганди. Умуман олганда, Жозе Моуриньо мураббийлик ишида жамоалари билан қаторасига 2-марта миллий лиганинг кучли 4талигига киролмади. «Беназир»нинг фаолиятида бундай омадсиз серияси биринчи марта кузатилганини ҳам айтиш керак. Эслатма, Жозе мавсум-2020|2021ни «Тоттенхэм» билан АПЛнинг 7-ўрнида якунлаганди. Айнан шу унинг мустақил иш давридаги энг паст натижа ҳисобланади. Қолаверса, Жозе Моу миллий чемпионатларда атиги 3 марта кучли 4таликни забт этолмаган, холос (2 марта 6-ўрин ва 1 марта 7-ўрин). Шу омадсизликларнинг барчаси охирги 4 мавсумга тўғри келгани унинг мураббийлик фалсафаси эскирганидан далолатми? Айтиш қийин.
* Жозе Моуриньо учун фаолиятидаги дастлабки 4 мавсум олтин давр ҳисобланади. Зеро, у бу оралиқда «Порту» ва «Челси» билан 2 мартадан чемпионлик нашидасини сурганди.
* Мавсум-2009|2010 Жозе Моуриньо учун энг омадлиси саналади. Португалиялик ўшанда «Интер»ни «требл» сари бошлаганди.
* Жозе Моуриньо мустақил мураббийлик фаолиятидаги дастлабки 10 мавсумда миллий чемпионатларда 2-ўриндан пастини тан олмаган. У бу орада 4та чемпионат (Португалия, Англия, Италия ва Испания)да 4та клубни бошқарганди.
ЕВРОКУБОК КЕРАКМИ, МОУНИ ЧАҚИРИНГ!
Жозе Моуриньонинг мураббийлик фаолияти воқеалар ва турли-туман фактларга бой. Ижобий фактлардан бири эса, еврокубокларга дахлдор. Мана, португалиялик мутахассис бу йил «Рома»ни 50 йилдан кейин Европа миқёсидаги турнирда ғалаба томон етаклади. Ҳа, Рим клуби нақ ярим асрдан буён евроаренада соврин нималигини билмаётганди. Қаранг, Жозе келди, кўрди ва бирданига клубнинг 1961 йили бошланган «қуруқ» сериясига қарата зарба берди («Рома» охирги марта Ярмаркалар кубогида зафар қучганди). Айтиш жоиз, муайян жамоанинг евроаренадаги омадсизлигига чек қўйиш Моу учун ўзига хос одатга айланиб улгурган. Ҳар ҳолда, у нақ 4та клубнинг қитъа миқёсидаги «қуруқ» сериясига барҳам бергани билан алоҳида мақтанишга ҳақли. Оддий айтганда, «Беназир» бунга қадар «Порту»ни 16 йил, «Интер»ни 12 йил, «МЮ»ни эса 9 йиллик танаффусдан кейин еврокубокларда ғалаба томон бошлаганди. Мана, Моу бу сафар «Рома»нинг 50 йиллик омадсизлигига нуқта босди. Демак, Европа жамоалари президент ёки раҳбарларига хитоб: «Еврокубоклардаги омадсиз серияни узиш керакми? Унда Жозе Моуриньога қўнғироқ қилинг!»
* Жозе Моуриньо «МЮ»ни афсонавий Алекс Фергюсондан кейин Европа майдонларида ғалаба сари етаклаган ягона мураббий.
РЕЙТИНГДА 3-ЎРИН!
Конференциялар Лигаси кубоги Жозе Моуриньо учун фаолиятидаги 25-соврин бўлди! Ўзига хос юбилей! 2000 йилдан буёғини ҳисобга олсак, Моу Европада жами жамоавий совринлар сони бўйича 3-ўринда. Ҳозирда ушбу рейтингни испаниялик Хосеп Гвардиола бошқариб турибди - 32та соврин. Лекин Пеп бутун фаолиятини элит гуруҳга мансуб жамоаларда ўтказмоқда. Ҳар ҳолда, «Барселона», «Бавария», «Манчестер Сити» билан соврин ютиш ва «Порту» ёки «Рома»ни ғалаба сари етаклаш ўртасида фарқ катта, барибир. Энг совриндор мураббийлар рейтингида иккинчи бўлиб турган руминиялик Мирча Луческу эса асосан Украинада муваффақият қозонган. Шу фактларнинг ўзи Жозе Моуриньо чиндан ҳам «Беназир» мақомига муносиб эканлигига далолат!
* 21-асрда Европада атиги 6 нафар мутахассис 20та жамоавий соврин маррасига етган, холос.
А.АҲМЕДОВ тайёрлади
