Англия футболида ноодатий можаро

The Sun нашрининг ёзишича, Лондонда исми ошкор этилмаган Премьер-лига футболчисига қурол билан таҳдид қилинган. Маълумотларга кўра, ҳодиса 6 сентябрь куни содир бўлган. Футболчи дўсти билан гавжум кўчада сайр қилиб юрган пайтда ҳужум содир этилган. Полиция 31 ёшли футбол агентини қўлга олган. У қурол билан таҳдид ва шантажда гумон қилинмоқда, аммо ҳали айблов қўйилмаган. Агент гаров эвазига озод қилинган ва унга футболчи билан боғланиш ҳамда футболчи жамоасининг машғулот базасига бориш тақиқланган. Шунингдек, унга Буюк Британияни тарк этиш ҳам тақиқланган. Агентнинг паспорти қайтарилган, аммо олдиндан белгиланган сафарлардан қайтгач, уни яна топшириши лозим бўлади. Лондон Метрополитен полицияси ҳозирда тергов олиб борилаётганини тасдиқлади. Маълумотларга кўра, футболчининг ёши 20 ёшдан ошган ва унинг трансфер қиймати 60 млн. фунт стерлингга баҳоланган. Гумон қилинган агент мижозлари орасида Англия терма жамоаси аъзоси ҳам бор.