Легионерларимиз: Асосий масала – Шомуродов тақдири

Яхши спорт формасида бўлишига қарамай, «Рома»да амалиётсиз қолиб, роса эзилган миллий жамоамиз сардорига даъвогарлар етарли.

*** 

«Кремонезе» директори Симоне Жаккетта клуб январь ойида «Рома»дан Элдор Шомуродовни сотиб олишга уриниб кўришини тасдиқлади. «Ҳа, бошқа позициялар қатори ҳужумни яхшилашни хоҳлаймиз. Шомуродов - яхши фазилатларга эга ижрочи. Унинг ўйинга тўғри муносабатда бўлиши ва борини беришга тайёр туриши жуда муҳим», - деди Жаккетта шартнома бўйича 2026 йилнинг ёзигача «Рома» билан боғланган ҳужумчимиз ҳақида. Маълумот учун, transfermarkt портали томонидан трансфери 7 миллион еврога баҳоланаётган Шомуродов жорий мавсум «Рома»нинг барча турнирлардаги атиги 8та ўйинида  қатнашиб, 1та гол урди. 

*** 

Corriere dello Sport маълумотига кўра, Шомуродов учун курашга «Сампдория» ҳам қўшилди. Генуя клуби «Рома» билан келишувга эришса, Элдор собиқ жамоаси - «Женоа»нинг ашаддий рақиби сафидан жой олади. Римликлар норвегиялик Ола Сольбаккен билан шартнома тузишгач, Элдорнинг кетиш эҳтимоли анча ошганини ҳам айтиш жоиз.

*** 

Италиялик инсайдер Никола Скиранинг маълумотига кўра, «Рома» бош мураббийи Жозе Моуриньо режаларида ҳамюртимизга имконият бериш йўқ. У шунинг баробарида 27 ёшли ҳужумчига «А» сериянинг икки клуби - «Монца» ва «Торино» жиддий қизиқаётгани ҳақида хабар тарқатди. Турин жамоаси ёзги трансферлар вақти ҳам Шомуродовга қизиққан, бироқ «Рома» уни ижара келишуви асосида беришни истамаганди. 

*** 

Умуман, Элдор Шомуродов хизматига Италиядан ташқарида ҳам қизиқиш йўқ эмас. Ҳар ҳолда, Англия, Германия, Франция, Россия, Туркия ва Саудия Арабистони клублари бот-бот тилга олинмоқда. Тўғри, Италия матбуотида «Монца», «Сампдория», «Торино», «Болонья» ва «Кремонезе»нинг футболчимизга даъвогар эканлиги ҳақида кўпроқ ёзилмоқда. Хусусан, footballnews24.it сайти журналисти Сержио Карлонининг айтишича, «Самп­дория», «Кремонезе» ва «Торино» ҳужумчи масаласида «Рома» билан расман алоқага чиққан. Tuttosport нашрида эса «Сампдория» раҳбариятининг Шомуродов бўйича позиция­си эълон қилинди. Унга кўра, Генуя клуби бош мураббийи Деян Станкович ҳамюртимизни мунтазам бошланғич таркибда майдонга туширишга тайёр.

«Рома» ЖЧ-2022 туфайли юзага келган танаффусдан фойдаланиб, Япония­да йиғин олиб бормоқда. Жозе Моуриньо жамоаси 25 ноябрь куни «кунчиқар юрт»даги дастлабки «ўртоқлик»да «Нагоя Грампус» билан куч синашди. Элдор ҳисоб очилмаган мазкур ўйиннинг 46-дақиқасида захирадан майдонга тушди.