«Жабрдийда» Неймар Бразилия чемпионати ўйинида қувончдан бурчак байроқчасини ағдарди, аммо унинг голи инобатга олинмади. Бразилиялик суперюлдуз якунда «Сантос» мухлиси билан жанжаллашишгача борди. Чунончи, клуб Бразилия «А» серияси турнир жадвалининг хавфли ҳудудида қолмоқда ҳамон.
СОФ ОМАДСИЗЛИК
Ҳа, Неймар Бразилия «А» серияси 16-турида янги саргузаштни бошдан кечирди. У бу сафар сўнгги дақиқаларда урган голини ўзгача эҳтирос билан нишонлади, фақат озгина шошилди. «Сантос» эса «Интернасионал»га ютқазиб (1:2), турнир жадвалидаги ҳолатини янада оғирлаштирди. Воқелик тафсилотига келсак, Неймарнинг 90+4-дақиқада йўллаган зарбасидан кейин ҳисоб деярли тенглашди. Тўп тушмагур устунга тегиб, чизиқ бўйлаб думалади, аммо ичкарига кирмади. Лекин бу Неймарнинг ўта дабдабали хатти-ҳаракати учун етарли бўлди. Эътиборлиси, «Сантос» учрашувнинг асосий вақти якунланган паллада ҳам 0:2 ҳисобида ортда эди. 90+1-дақиқада эса Альваро Барреаль биринчи жавоб голини уриб, жамоага умид бағишлади. 90+4-дақиқа: Неймар уринишидан сўнг ҳисоб тенглашадигандек туюлди. У жарима майдони бурчак қисмидан кучли зарба йўллагач, дарвозабон бармоғининг учи билан тўпга тегинди. Якунда тўп устунга тегиб, дарвоза чизиғи устида думалади ва кипер «ўлжа»сига айланди. Неймар эса бу вақтда гол бўлишига шубҳаланмади ва бурчак томон югурди. У аввалига майдон устида тиззалари билан «сузди», кейин мухлисларга қараб, кўкрагига астойдил урди ва бурчак байроқчаси таёғини иккига бўлиб ташлади. Ней майдонга бурилиши билан гол ҳисобланмаганини тушунди. Футболчи шунда қўлларини ёйди, тиззалаб ўтирди, аммо эътирозлардан наф йўқ. Ахир тўп дарвоза чизиғини кесиб ўтмаганди.
Ҳакамнинг финал ҳуштаги янграгач, аламзада футболчи «Сантос» мухлисларидан бири билан тортишишгача борди. Бинобарин, Бразилиянинг энг машҳур клуби ҳамон лигада қолиш учунгина курашмоқда. Жамоа 17та турдан кейин атиги 15 очко билан 20та иштирокчи орасида 17-ўрин (қуйи лигага тушиб кетиш ҳудуди)ни банд этиб турибди (жамоа 17-турда «Спорт Ресифи» билан баҳсда дуранг қайд этганини ҳам қўшимча қилиш ўринли). Неймар эса «Сантос»га қайтганидан буён ўйинларнинг жами 33 фоиз вақтида ўйнади, холос. Футболчи ўйинларнинг ярмини жароҳат туфайли ўтказиб юборди, боз устига, қўли билан гол ургани ортидан аҳмоқона дисквалификацияга дучор бўлди. Энг қизиғи, булар Неймарнинг «Сантос» билан шартномаси муддатини йил охиригача узайтиришига тўсқинлик қилолмади. Маош ўша-ўша - ойига тахминан 700 минг евро. Чемпионатнинг 17та турида «Гол+пас» тизими бўйича 1 балл (1та гол) ишлаган футболчи учун фантастик маош!
Неймар «Сантос»га қайтганидан сўнг Бразилия «А» сериясида
1-тур. «Васко да Гама» - 1:2. Жароҳат
2-тур. «Баия» - 2:2. Жароҳат
3-тур. «Флуминенсе» - 0:1. 45 дақиқа, сариқ карточка
4-тур. «Атлетико Минейру» - 2:0. 34 дақиқа
5-тур. «Сан-Паулу» - 1:2. Жароҳат
6-тур. «РБ Брагантино» - 1:2. Жароҳат
7-тур. «Гремио» - 0:1. Жароҳат
8-тур. «Сеара» - 0:0. Жароҳат
9-тур. «Коринтианс» - 0:1. Жароҳат
10-тур. «Витория» - 1:0. 26 дақиқа
11-тур. «Ботафого» - 0:1. 76 дақиқа, сариқ ва қизил карточка
12-тур. «Палмейрас» - ўйин қолдирилган.
13-тур. «Форталеза» - 3:2. Дисквалификация
14-тур. «Фламенго» - 1:0. 90 дақиқа, гол
15-тур. «Мирасол» - 0:3. 90 дақиқа
16-тур. «Интернасьонал» - 1:2. 90 дақиқа
17-тур. «Спорт Ресифи» - 2:2, 90 дақиқа
СОФ РЕКОРД
Иккинчи томондан, Неймар 31 июль куни битта ноёб рекорд соҳибига айланди. Аниқроқ айтсак, шу санада бразилиялик суперюлдузнинг трансфер суммаси бўйича жаҳоннинг энг қимматбаҳо футболчиси мақомини олганига 7 йил 11 ой 28 кун тўлди. Хуллас, Неймар бу борада машҳур Зайниддин Зиданни ортда қолдирди. Франциялик афсона 7 йил 11 ой 27 кун давомида жаҳоннинг амалдаги энг қимматбаҳо футболчиси сифатида қайд этилган. Тушунарлики, охирги 50 йилликда трансферлар суммаси кескин ошиб кетди. Дейлик, 1980 йили жаҳон футболида рекорд трансфернинг қиймати атиги 3 миллион еврони ташкил этган. Ўшанда Энди Грэй «Астон Вилла»дан «Вулверхэмптон»га айнан 3 «лимон» эвазига ўтганди. Янги аср остонасида эса трансферлар суммаси мислсиз даражада кўтарилиб кетди. Мисол учун, «Интер» 1999 йили Кристиан Вьери учун «Лацио»га 46,5 миллион евро тўлади ва италиялик ҳужумчи атиги 1 йил 10 кун давомида дунёнинг энг қимматбаҳо футболчиси бўлиб турди. 2001 йилга келиб, Зайниддин Зидан тахтга кўтарилди. Ўшанда «Реал» раҳбарияти франциялик даҳо учун «Ювентус»га 77,8 миллион евро тўлаганди. Буюк Зизу шу тариқа 7 йил 11 ой 27 кун мобайнида энг катта суммага харид қилган футболчи бўлиб турди. Мана, 31 июль куни бу борадаги рекорд (жаҳоннинг энг қимматбаҳо футболчиси сифатида энг узоқ вақт қолиш) Неймар томонидан янгиланди.
Эслатма, 2017 йили «ПСЖ» раҳбарияти «Барселона»дан бразилиялик суперюлдузни 222 миллион еврога сотиб олганди. Ўша вақт жаҳон рекорди 105 миллион евро эвазига «Ювентус»дан «МЮ»га қайтган Поль Погбага тегишли эди. Хуллас, деярли 8 йилдан буён Неймар трансфер суммаси бўйича 1-ўриндан тушаётгани йўқ. Жаҳон футболида энг узоқ вақт энг қимматбаҳо футболчи мақомида юрган 10 нафар юлдуз рўйхатига қарасак, унда Неймар ва Зидандан ташқари, Жанлука Виалли, Криштиану Роналду, Диего Марадона, Гарет Бэйл кабиларни кўриш мум-кин.
Орада Неймар олдида Европага қайтиш варианти юзага келгани айтилди. Аниқроғи, бразилиялик юлдуз хизматига «Марсель» жиддий қизиқиш билдирди. 33 ёшли ҳужумчи яқинда «Сантос» билан шартномаси муддатини 2025 йил охиригача узайтирган бўлсада, Франция клуби уни «кўҳна қитъа»га қайтаришга тайёр эди. Футболчининг ўзи ҳам яна Европада ўйнашга мойилдек кўринди. Бироқ амалда бу трансфер гап-сўзлигича қолди. Статистика ихлосмандлари учун, Неймар жорий йил барча турнирлар ҳисобидан 16та ўйинда майдонга тушиб, 4та гол ва 3та ассист тўплади.
Манба: sports.ru, Жаҳонгир МИРЗО тайёрлади
