Саудия Арабистони Премьер-лигаси қисқа вақт ичида футбол иқтисодиётини бутунлай ўзгартириб ташлади. Катта номлар, йирик маош, ҳатто Криштиану Роналду юзини қизартирадиган даражада нефть пуллари. Португалиялик юлдуз 2023 йили шайхлар қўлидаги «қора олтин» томон ошиқди ва кўп ўтмай, ўнлаб футболчилар унга эргашдилар. Жаҳон чемпионларидан тортиб, АПЛ афсоналаригача Саудия юқори дивизионига кўчиб ўтиш асносида сайёрамизнинг энг бой спортчилари рўйхатига киришди. Келинг, Яқин Шарқнинг энг ҳимматли чемпионатида энг катта маош эвазига ўйнаётган футболчилар рўйхатига яна бир бора назар ташлаймиз.
№ 10. Эмерик Ляпорт («Ал-Наср») - йилига 24,5 млн. евро ёхуд кунига 67,1 минг евро
Эмерик Ляпорт кечагина Хосеп Гвардиола бошқарувида барча рақиблар додини берган қудратли «Манчестер Сити»нинг ажралмас қисми саналарди. Кейинчалик нималардир рўй бердию, испаниялик ҳимоячи таркибдан тушиб қолди ва охир-оқибат, жамоадан кетди. Хуллас, 2023 йилдан «Ал-Наср»да ўйнаётган Эмерик кунига 67100 евро топмоқда.
№ 9. Александер Митрович («Ал-Ҳилол») - йилига 25 млн. евро ёхуд кунига 68,5 минг евро
Катта истеъдодга эга, лекин етарлича қадрланмаган ҳужумчи шайхларнинг мўмай таклифларига қарши туролмасди. Сербиялик «Ал-Ҳилол»даги дебют мавсуми 43та ўйинда 40та гол урди. Митрович Чемпионшип-2021|2022да ҳам деярли шундай статистика қайд этганди - «Фулхэм» учун 43та ўйинда 44та гол. Айтганча, Митровичнинг АПЛга қайтиши эҳтимоли ҳақида миш-мишлар бор, даъвогар клублар қаторида эса «Эвертон» тилга олинмоқда. Бироқ «ирислар» молиявий томондан бундай шартномани кўтаролмайдилар. Ахир ҳужумчи Саудияда кунига 68,5 минг евро оляпти, табиийки, унинг ўзи ҳам «Ал-Ҳилол»дан кетишни ўйлаётгани йўқ.
№ 8. Сергей Милинкович-Савич («Ал-Ҳилол») - йилига 25 млн. евро ёхуд кунига 68,5 минг евро
Кўп йиллар давомида Европа грандлари билан боғланган футболчи. Сергейга жумладан, «МЮ», «Ювентус» ва «ПСЖ»дек катта клублар қизиққанди. Лекин у 2023 йилнинг июлида «Лацио»дан Саудияга талпинди: «Ал-Ҳилол» трансферга 40 млн. евро тўлаш баробарида футболчининг ўзига шоҳона шароитлар таклиф этди. Милинкович-Савич ҳозир лиганинг етакчи ярим ҳимоячиларидан бири ва шунга мувофиқ, энг кўп маош оладиган футболчилар қаторида.
№ 7. Н~Голо Канте («Ал-Иттиҳод») - йилига 25 млн. евро ёхуд кунига 68,5 минг евро
Шу кунга қадар футбол олами камтарин Канте ҳақида салбий фикр эшитган эмас. АПЛнинг икки карра чемпиони, ЧЛ ва ЖЧ ғолиби саналган франциялик футболчи барқарорлигию, ёқимтойлиги билан алоҳида ажралиб туради. Мана, Н~Голо Малида мактаблар қуришда ёрдам берди, ҳамиша оиласига ғамхўр, шахсий ҳаётини сира кўз-кўз қилмайди. Ваҳоланки, йилига 25 «лимон» ҳар қандай камсуқум йигитни талтайтириб юбориши ҳеч гап эмас.
№ 6. Айвен Тоуни («Ал-Аҳли») - йилига 25,5 млн. евро ёхуд кунига 69,9 минг евро
Ғайриоддий ҳужумчи, марказий ҳимоячиларнинг ҳақиқий душмани. Айвен мавсум-2022|2023да «Брентфорд» учун Чемпионшипда 20та гол урганидан сўнг унинг келажагини топ-клубда кўришганди. Лекин йиртқич голеадор жимгина 40 млн. евро эвазига «Ал-Аҳли» сафига қўшилди ва Саудияда ўйнаётган Англия терма жамоасининг ягона вакилига айланди. 29 ёшли тўпурар лигадаги илк мавсумини муносиб якунлади ҳам - 43та ўйинда 40та гол.
№ 5. Калиду Кулибали («Ал-Ҳилол») - йилига 34,7 млн. евро ёхуд кунига 95,1 минг евро
Калиду Кулибалининг бойлик сари йўли Сенегалда, отасига тегишли тўқимачилик фабрикасидаги тинимсиз ишдан бошланган - ҳафтасига 7 кун машаққатли меҳнат, дам олиш йўқ... Барчаси оиласини Францияда яхшироқ яшашини таъминлаш учун эди. Хуллас, Калиду турли-туман қийинчиликларни кўрди ва пул қадрини ўлчашни ҳам ўрганди. Шундай экан, у саховатпеша шайхлардан тушган «гўзал» таклифдан юз ўгиролмасди.
№ 4. Садио Мане («Ал-Наср») - йилига 40 млн. евро ёхуд кунига 109,6 минг евро
«Ливерпул»нинг кечаги етакчиларидан бири. Сенегаллик вингер «қизиллар» сафидаги 269та ўйинда 120та гол урди, имкони бор барча совринларни қўлга киритди. Асосийси, Садио АПЛ ҳимоячилари учун ҳақиқий бошоғриқ саналарди. Бироқ у 2022 йили «Энфилд»дан кетди, «Бавария»даги омадсиз мавсумдан кейин эса «Ал-Наср» таклифини қабул қилди. Мане энди шайхлардан санаб олаётган беҳисоб пулдан бир қисмини Сенегалдаги она шаҳрида мактаблар, шифохоналар қуриш ва кам таъминланган оилаларни молиялаштиришга йўналтирмоқда.
№ 3. Карим Бензема («Ал-Иттиҳод») - йилига 50 млн. евро ёхуд кунига 136,9 минг евро
Бензема Саудия Арабистонига «Олтин тўп» ва ЧЛнинг 5та кубоги билан йўл олди. 2та асосий турнирда ғолиб чиқиш асносида «Ал-Ҳилол» ҳукмронлигига барҳам берган «Ал-Иттиҳод» эса бугун Каримдан бениҳоя хурсанд. Ахир у якунланган мавсум жамоа сардори сифатида майдонга тушиб, чемпионатнинг ўзида 21та гол урди. Франция миллий жамоаси собиқ ҳужумчиси аллақачон 37 ёшда, лекин ҳали бутсаларини михга осмоқчи эмас. У ҳозирда қимматбаҳо автомобиллардан катта коллекция яратмоқда - яқинда атиги ярим кунлик маошига BMW M5 сотиб олди, камига актриса Лина Кудрига уйланмоқчилигини ҳам айтди.
№ 2. Риёд Маҳрез («Ал-Аҳли») - йилига 52,2 млн. евро ёхуд кунига 143 минг евро
Фаолиятида 2та клуб билан АПЛда ғалаба нашидасини сурган кам сонли футболчилардан бири. Унинг ютуқлари рўйхати жуда таъсирли: «Лестер» афсонаси, «Манчестер Сити» билан «требл» муаллифи, Африка чемпиони... Хўш, Риёдга яна нима керак эди? Ҳа, йилига 52 млн. евро! Дарвоқе, 2023 йили «Ал-Аҳли» либосини кийган Маҳрез якунланган мавсум совринлар коллекциясига Элит ОЧЛ кубогини ҳам қўшиб қўйди. Айтишларича, Риёднинг турмуш ўртоғи аввалига Саудияга кўчиб ўтишни хоҳламаган, лекин эрига таклиф этилган маош уни ҳам Яқин Шарқ томон етаклади.
1. Криштиану Роналду («Ал-Наср») - йилига 200 млн. евро ёхуд кунига 547,9 минг евро
Нафақат Саудия Арабистони, балки бутун дунёда энг кўп маош оладиган спортчи. Криштиану Роналдунинг «Ал-Наср» билан янги келишуви шунчаки, фантастика! Йилига 200 млн. евролик маош (бонусларсиз), 16 кишидан иборат персонал, шахсий самолёт харажатига тўлов, чемпионлик, ҳар бир гол ва ассист эвазига алоҳида қўшимча мукофот, яна клубнинг 15 фоиз акцияси! Барчаси Криштиану мамнун ҳолда самарали ўйнашда давом этиши учун. Криш энди Саудияда 1000та гол маррасига боғлиқ орзусига ҳам етишиши мумкин.
Манба: soccer.ru, МУҲАММАДХОН тайёрлади
