Тожикистон футболи афсонаси, Фарҳод Васиев Ўзбекистон МТЖ бош мураббийи Темур Кападзенинг терма жамоа бош мураббийлигидан кетиши мумкинлиги ҳақидаги хабарларга муносабат билдирди.
— Мен ҳеч нарсани тушунмаяпман. Темур Кападзе саралашдаги сўнгги ҳал қилувчи тўртта учрашувда Ўзбекистон миллий термасини бошқарди ва жамоа ишончли ўйин кўрсатди. У йигитлар билан қандай мумомала қилиш кераклигини жуда яхши билади. Ўзимиздан қиёс қилиб айтадиган бўлсам, Тожикистон терма жамоасига хорижлик кўплаб мураббийлар таклиф қилинди. Аммо фарқ шундаки, улар тартиб-интизом ва ўз қоидаларини ўрнатишга ҳаракат қилишди. Охир-оқибат, ҳеч қандай натижа бўлмади. Мен эса 15 йилимни шу чалкашликда ўтказдим, нима ҳақида гапираётганимни жуда яхши тушуниб турипсиз.
Футболчилар учун маҳаллий мураббийлар билан ишлаш анча қулай. Масалан, бош жамоамизни ўз вақтида Маҳмуджон Ҳабибуллоев, кейин Пўлат Қодиров бошқарган. Улар футболчилар билан қандай гаплашиш кераклиги ва кимдан нимани талаб қилишни жуда яхши тушунишган. Шунингдек, ҳамма нарсага хотиржамлик билан муносабатда бўлишган. Кейин Россиядан Алимжон Рафиқов келди. Аммо у фақат интизомга эътибор қаратиб, шарт-шароитларни, қоидаларни ўзгартиришни бошлади. Табиийки, бундай ёндашув терма жамоадаги ҳаммага ҳам ёқмади. Натижада - Жаҳон чемпионати саралашидаги бешта мағлубият умумий ҳисобда 0:17. Терма жамоа тарихидаги энг ёмон натижа.
Шу боисдан терма жамоага ташриф буюрадиган хорижлик мураббийларга қатъиян қаршиман. Улар, биринчи навбатда, ўзларини, амбицияларини кўрсатиш ва амалга ошириш учун келишади. Улар ишлайди ва кетишади. Шунинг учун мен Кападзе тарафдориман. Ва барчани Темур Тохировични қўллаб-қувватлашга чақираман. Энди бутун Марказий Осиёнинг эътибори Ўзбекистон терма жамоасига қаратилган. Биз ҳаммамиз қўшниларимиз учун чин юракдан мухлислик қиламиз. Умид қиламанки, Тожикистон ҳам эртами кечми жаҳон чемпионатида иштирок этади.
